Bicholim Municipal Council Workers: एका बाजूला सर्वत्र चतुर्थीचा उत्साह असताना, डिचोली शहरात पालिकेचे सफाई कामगार चतुर्थीची उमेद मनातच ठेवून आपले कर्तव्य निष्ठेने बजावत असल्याचे दिसून आले. चतुर्थीवेळी विक्रेत्यांनी बेशिस्तपणे टाकून दिलेले माटोळीचे साहित्य आणि इतर कचऱ्यामुळे बाजारात प्रचंड प्रमाणात कचरा साचला होता.

जेसीबी यंत्राच्या सहकार्याने चतुर्थीच्या पूर्व रात्रीपासून ही विशेष स्वच्छता मोहीम सुरू असून, गेल्या तीन दिवसांत दहाहून अधिक ट्रक कचऱ्याची उचल करण्यात आली.

८० टक्के कचरा हटवला

शिल्लक राहिलेले माटोळीचे साहित्य विक्रेत्यांनी तसेच टाकून दिले. त्यामुळे कचऱ्याच्या राशी साचल्या आहेत. गुरुवारी सायंकाळपर्यंत जवळपास ८० टक्के कचरा हटविण्यात कामगारांना यश आले. बाजारात साचलेला संपूर्ण कचरा उचलण्यास आणखी दोन दिवस लागण्याची शक्यता आहे.

असंवेदनशील विक्रेते

माटोळीचा कचरा विक्रेत्यांनी त्वरित पेट्यांमध्ये टाकला असता तर पालिकेच्या कर्मचाऱ्यांवर ताण आला नसता. बाजारातील कचरा उचलण्याचे काम गेले तीन दिवस स्वच्छता कामगार करत आहेत. बुधवारी आठवडी बाजारामुळे या कामात व्यत्यय आला.