पणजी: प्रतिभाशाली बुद्धिबळपटू एथन वाझ याने शनिवारी गोमंतकीय बुद्धिबळात नवा पराक्रम रचला. वयाच्या चौदाव्या वर्षी तो भारतातील ९६वा, तर सध्‍याच्‍या सक्रिय बुद्धिबळपटूंत देशात सर्वांत युवा ग्रँडमास्टर ठरला. या किताबासाठी त्याने आवश्यक तिन्ही नॉर्म प्राप्त केले.

बोस्निया-हर्झेगोविना येथे शनिवारी संपलेल्या ‘चेस समर इन साराजेव्हो - जीएम मिक्स’ या स्पर्धेत एथन याने ग्रँडमास्टर किताबासाठी आवश्यक तिसरा नॉर्म प्राप्त केला. या स्पर्धेत त्याने विजेतेपदही प्राप्त केले.

ग्रँडमास्टर किताबाच्या तिसऱ्या नॉर्मसह एथन सध्याच्या सक्रिय बुद्धिबळपटूंत भारताचा सर्वांत युवा ग्रँडमास्टर, तर जगातील दुसऱ्या क्रमांकाचा युवा ग्रँडमास्टर खेळाडू ठरला असल्याची माहिती एथनचे वडील एडविन वाझ यांनी दिली. एथनने क्लासिकल बुद्धिबळात मार्चमध्ये २५२२ हे सर्वोत्तम एलो रेटिंग प्राप्त केले होते. अनुराग म्हामल व लिऑन मेंडोन्सा यांच्यानंतर आता एथन गोव्याचा तिसरा ग्रँडमास्टर असेल.

यापूर्वी गोव्याचा सर्वांत युवा ‘आयएम’

एथन हाच गोव्याचा सर्वांत युवा इंटरनॅशनल मास्टर (आयएम) बुद्धिबळपटूही आहे. जानेवारी २०२४ मध्ये तो आयएम किताबासाठी पात्र ठरला तेव्हा त्याचे वय १२ वर्षे व ४ महिने इतके होते.