पणजी: अतिक्रमणाविरुद्ध कारवाईसाठी ठराव घेणारे पंच सदस्य स्वतः अतिक्रमण करत असले, तरी त्याविरुद्ध पंचायतीकडून कारवाई केली जात नाही. असाच प्रकार सांताक्रुझ पंचायतीचे प्रभाग 3 मधील सदस्य लॉरेन्स रॉड्रिग्ज यांनी पदपथावर अतिक्रमण करून निवारा (शेड) उभारली आहे. याप्रकरणी स्थानिक मिल्टन आरावजो यांनी पंचायतीकडे तक्रार दाखल केली आहे. मात्रस अजूनही त्यांना पंचायतीकडून नोटीस बजावली गेली नाही.

सांताक्रुझ - बांबोळी या जुन्या रस्त्याच्या बाजूला पंच सदस्य लॉरेन्स रॉड्रिग्ज यांचे घर व कंपाऊंड आहे. या कंपाऊंडच्या बाहेर पदपथावर दोन्ही बाजूने शेड उभारण्यात आल्या आहेत. काही दिवसांपूर्वी या शेडचा वापर दुकान थाटण्यास देण्यात आला होता.

तक्रार दाखल झाल्यानंतर ते हटविण्यात आले. या शेडमुळे पदपथावरून चालण्यास पादचाऱ्यांना अडथळे येत आहेत. या शेडमुळे वाहन चालकांनाही समोरून येणाऱ्या वाहनाचा अंदाज येत नाही त्यामुळे अपघाताचा संभव आहे. त्यामुळे या शेडविरोधात पंचायतीने त्वरित कारवाई करावी, अशी मागणी आरावजो यांनी तक्रारीत केली आहे.

सांताक्रुझ मार्केट ते ग्रीन व्हॅली जंक्शनवर रस्त्याच्या बाजूने मोठ्या प्रमाणात संध्याकाळच्यावेळी गाडे उभे करून खाद्यपदार्थांची विक्री केली जाते. या खाद्यपदार्थासाठी अनेकजण वाहने रस्त्याच्या कडेलाच उभी करून ठेवत असल्याने दुतर्फा मार्गावरील रस्त्यावर वाहनांची कोंडी होते तसेच अपघाताचा धोका संभवू शकतो. स्थानिक पंच सदस्य मात्र त्याकडे डोळेझाक करत आहेत. सुट्टीच्या दिवशी रस्त्यावर काहीजण पंचायतीची परवानगी नसतानाही चर खोदतात व ते बुजविले जात नाहीत. त्यामुळे वाहनचालकांना या खड्ड्यातून जावे लागते. हल्लीच या भागातील रस्त्याचे डांबरीकरण झाल्यानंतर रस्त्यावर चर खोदण्याचे प्रकारघडत आहेत.