Electricity Problem : वीज खाते शट डाऊन घोषित करते, मात्र त्याचा पता येथील वीज कर्मचाऱ्यांना नसतो. त्यांच्याशी संपर्क केल्यास, शट डाऊन नाही, असे उत्तर दिले जाते. हे ऐकून अनेक ग्राहकांनी आश्चर्य व्यक्त केले. मागील दोन दिवस विजेचा खेळखंडोबा सुरू असल्याने येथील ग्राहकांत प्रचंड नाराजी पसरलेली आहे.

वीज खात्यात सध्या अनागोंदी कारभार चालू आहे. गेले अनेक महिने वीज गुल होण्याचे प्रकार वाढले आहेत. गुरुवारी सकाळपासून आठ ते दहा वेळा वीज गुल झाली. तसेच रात्री बारा वाजण्याच्या सुमारास वारा पाऊस नसतानाही अचानक वीज गुल झाली. तब्बल दीड तासाने पुरवठा सुरळीत झाला. याबाबत येथील अमनदीप नाईक यांनी तीव्र संताप व्यक्त केला. वीज खात्यातील अनागोंदी कारभाराचे सामान्य ग्राहक बळी ठरत असल्याचे नाईक म्हणाले.

वीज खाते शट डाऊन जाहीर करते, मात्र याची कल्पना स्थानिक कर्मचाऱ्यांना नसते. मग हे शट डाऊन नेमके कोणासाठी केले जाते, असा प्रश्‍न ग्राहकांकडून उपस्थित केला जात आहे. दिवसा होत असलेले शट डाऊनचे प्रकार रात्रीच्या वेळेत असह्य वाटू लागतात, असे गृहिणी श्वेता नाईक यांनी सांगितले.

नवे सब स्टेशन

मांद्रे मतदारसंघातील आठ पंचायत क्षेत्रातील ग्राहकांसाठी नवीन सब स्टेशनचे काम युद्धपातळीवर सुरू असून सब स्टेशन कार्यान्वित झाले की वीज पुरवठ्यात सुधारणा होईल, असा आशावाद वीज खाते व आमदार जीत आरोलकर यांनी वेळोवेळी व्यक्त केला आहे. त्यामुळे कधी एकदा हे सब स्टेशन सुरू होते याकडे नागरिकांचे नजर लागली आहे.