पणजी: पावसाळ्यात कोणतीही गैरसोय होऊ नये म्हणून वीज विभागाकडून मान्सूनपूर्वी विजेची कामे हाती घेण्यात आली आहेत. मात्र सोमवारी रात्री वादळी वाऱ्यासह कोसळलेल्या मुसळधार पावसामुळे राज्यातील अनेक भागात बत्ती गुल झाली. (electrical equipment damaged due to heavy rain in goa)

मांद्रे येथे वादळी वाऱ्यासह पाऊस झाला, तर राज्याच्या इतर भागात हलका पाऊस झाला. मात्र, यामुळे संपूर्ण उत्तर गोवा जिल्ह्यात वीजपुरवठा खंडित झाला. पर्वरीच्या रहिवाशांनी सांगितले की, त्यांना सुमारे सहा तास अंधारात रहावे लागले.

पेडणे येथील लोकांना देखील वीज पुरवठा खंडित झाल्याने त्रास सहन करावा लागला. ते म्हणाले, वीज पुरवठा अद्यापही पूर्ववत झालेला नाही. मंगळवारी सायंकाळपर्यंत तालुक्यातील अनेक घरांमध्ये वीज नसल्याची तक्रार होती.

वीज विभागाच्या म्हणण्यानुसार, सोसाट्याच्या वाऱ्याने झाडे उन्मळून पडली आणि काही विजेचे खांब कोसळले. वीज विभागाचे मुख्य विद्युत अभियंता स्टीफन फर्नांडिस म्हणाले, "प्रामुख्याने
डिचोली, साखळी, बाणावली येथील विजेच्या तारा तुटल्या. तांत्रिक समस्येमुळे सोमवारी रात्री दुरुस्तीचे काम होऊ शकले नाही", असे ते म्हणाले.

ते पुढे म्हणाले, “सकाळपासून युद्धपातळीवर कामाला सुरुवात झाली आहे. 50% वीजपुरवठा पूर्ववत करण्यासाठी अभियंत्यांनी रात्रभर काम केले,” फर्नांडिस यांनी दावा केला."