राज्यात न्हावेली-साखळी आणि दाबोळी येथे दाेन वेगवेगळ्या ठिकाणी झालेल्या अपघातांत एकूण आठजण जखमी झाले. न्हावेली-साखळी येथे शनिवारी संध्याकाळी कदंब बस व गोमेकॉच्या कर्मचाऱ्यांना घेऊन जाणाऱ्या बसची समोरासमोर टक्कर झाली.

या अपघातात कदंब बस व गोमेकॉ कर्मचाऱ्यांच्या बसमधील पाचजण जखमी झाले. ही धडक इतकी जबरदस्त होती की, कदंब बसची दिशाच बदलून ती रस्त्याबाहेर गेली.

अपघाताचे वृत्त समजताच न्हावेलीचे सरपंच कालिदास गावस व इतरांनी घटनास्थळी धाव घेतली व बसमधील जखमींना बाहेर काढले. जखमींना उपचारासाठी साखळी येथील सामाजिक आरोग्य केंद्रात नेले.

दुसऱ्या घटनेत आज दुपारी आल्तो-दाबोळी येथे ट्रॅफिक सिग्नलजवळ वास्कोच्या दिशेने भरवेगाने जाणाऱ्या एका टिप्पर ट्रकने ओम्नी, ब्रिझा, ॲक्टीव्हा आणि पाण्याच्या टँकरला जोरात धडक दिली.