Goa E-Auto: सेवा, सुशासन आणि जनकल्याण कार्यक्रमाचा भाग म्हणून दिव्यांगाच्या सोयीसाठी २४ एप्रिल पासून राज्यात ई-रिक्षा सुविधेचे अनावरण मुख्यमंत्री प्रमोद सावंत यांच्याहस्ते करण्यात आले. दिव्यांग व्यक्तींचा प्रवास सुलभ करण्यासाठी राज्य दिव्यांगजन आयोग व्हीलचेअर सुलभ ई-रिक्षा सेवा सुरू केली.

कामाच्या ठिकाणी, रुग्णालये, शाळा आणि इतर ठिकाणी प्रवास करताना व्हीलचेअर वापरणाऱ्यांना दिव्यांग व्यक्तींना अनेक समस्यांना सामोरे जावे लागते. त्यामुळे त्यांचा प्रवास सुखकर व्हावा, या उद्देशाने या सुविधेला सुरूवात करण्यात आली होती.

एका ॲपद्वारे रिक्षा बुक करावी लागते. या वाहनात दोन सदस्य दिव्यांग प्रवाशासोबत जाऊ शकतात. या रिक्षामध्ये चढताना रिक्षाचा मागचा दरवाजा रॅम्प मध्ये रूपांतरित होतो.

याशिवाय, सुरक्षिततेला अत्यंत महत्त्व दिले असून व्हीलचेअरसाठी चारही बाजूला व्यवस्था करण्यात आली आहे.

ही सुविधा मोफत नसली तरी दिव्यांगांना कोठे जायचे असेल, तर कोणतीच वाहतूक सुविधा उपलब्ध नव्हती, हे लक्षात घेऊन या सुविधेची सुरूवात केली आहे. एकूण ५ रिक्षा या अंतर्गत चालविल्या जात आहेत,असे पावसकर यांनी सांगितले.