वास्को: ओरुले वास्को येथे सुशिला संकुल या इमारतींचे सांडपाण्याची घाण येथील उघड्यावर असलेल्या गटारमध्ये सोडत असल्याने या भागात घाणीचे साम्राज्य पसरले आहे. रोगराई पसरण्याची येथील नागरिकांनी भिती व्यक्त केली असून संबंधितांनी यावर कारवाई करावी अशी मागणी येथील नागरिकांकडून होत आहे.

(Due to dumping in open drains area became polluted vasco)

दत्तवाडी ओरुले वास्को येथे पाच वर्षापूर्वी उभारण्यात आलेल्या सुशिला संकुल या इमारतीतील सांडपाणी उघड्यावर सोडण्याच्या प्रकारात वाढ झाली आहे. सदर सांडपाणी सकाळी व संध्याकाळच्या वेळी सोडले जाते.

त्यामुळे या भागात दुर्गंधीचे साम्राज्य पसरले आहे. तसेच रोगराई पसरण्याची शक्यता नाकारता येत नाही. त्यामुळे येथील नागरिकांत भीतीचे वातावरण निर्माण झाले आहे. सदर घाण मुद्दामहून सोडली जाते असा दावा येथील लोकांनी केला आहे. त्यामुळे या भागात राहणाऱ्या लोकांना नाक दाबून दिवस काढावे लागतात.तसेच दोन वेळचे अन्न पोटात घालतानासुद्धा नाकीनऊ येत असल्याचे लोकांचे म्हणणे आहे.

दरम्यान संबंधीत अधिकाऱ्यांनी, आरोग्य खाते, पालिकेने सदर ठीकाणी भेट देऊन सांडपाणी सोडत असलेल्या सदर सुशिला संकुल इमारतीतील लोकांवर कारवाई करावी अशी मागणी येथील नागरिकांकडून होत आहे.

दरम्यान या ठीकाणी दत्त मंदिर असून थोड्याच दिवसात दत्त जयंती उत्सव याठीकाणी मोठ्या प्रमाणात साजरा होणार आहे. तत्पूर्वी या ठीकाणी सांडपाणी सोडणाऱ्यांवर त्वरीत कारवाई करण्यात यावी अशी मागणी होत आहे. अन्यथा रस्त्यावर उतरू असा इशाराही येथील नागरिकांनी दिला आहे.