CM Pramod Sawant: पंचायतींनी आपला निधी केवळ गटारांसाठी वाया न घालवता गावात नवीन विकासांचे स्रोत आणण्यासाठी वापरावा. दूरदृष्टी बाळगून गावाचा विकास कसा करता येईल, नवीन तंत्रज्ञानाचा वापर समस्या सोडवण्यासाठी कसा होईल, याचा विचार पंचायतींनी करावा.

कचरा व्यवस्थापनाबाबत हरवळे या अत्यंत लहान पंचायतीचा आदर्श गोव्यातील इतर पंचायतींनी घ्यावा, असे आवाहन मुख्यमंत्री डॉ. प्रमोद सावंत यांनी केले.

हरवळे पंचायतीने उभारलेल्या ‘एमआरएफ’ या कचरा व्यवस्थापन शेड, गावठी बाजार शेडचे उदघाटन व गावातील स्वावलंबी व्यावसायिकांच्या गौरव सोहळ्यात मुख्यमंत्री डॉ. सावंत बोलत होते.

यावेळी व्यासपीठावर जिल्हा पंचायत

सदस्य गोपाळ सुर्लकर, नगराध्यक्षा रश्मी देसाई, श्रीनिवास राव कलाकुंटला, सरपंच अंकुश मळीक, उपसरपंच ममता दिवकर, स्वयंपूर्ण मित्र सतीश वाघोणकर, गटविकास अधिकारी ओमकार मांद्रेकर, पंचसदस्य नंदिनी गावस, संजय नाईक आणि मान्यवर उपस्थित होते. यावेळी गोपाळ सुर्लकर, रश्मी देसाई यांनीही विचार व्यक्त केले. स्वागत पंचसदस्य संजय नाईक यांनी केले.

...तर प्रशस्त इमारत असती

हरवळेतील लोकांनी पंचायतीसाठी हट्ट धरून ती साकारण्याचा संकल्प सार्थ ठरविला आहे. राज्यात सर्वांत लहान असलेल्या या पंचायत क्षेत्रात आज सर्व आवश्यक साधनसुविधा आहेत; परंतु स्वतःची पंचायत इमारत नाही. जर गावातील लोकांनी सामाजिक जबाबदारी ओळखून जागा दिली असती तर या पंचायतीची प्रशस्त इमारत उभी राहिली असती, असेही मुख्यमंत्री यावेळी म्हणाले.