मडकई : म्हार्दोळ परिसरात दोन कुत्र्यांनी दहशत माजवली असून दुचाकीवरून जाणाऱ्यांना चावे घेण्याचे प्रकार या दोन्ही कुत्र्यांनी चालवले असल्यामुळे परिसरातील लोकांत घबराट पसरली आहे. (Dog terror in Mhardol Goa)

म्हार्दोळ बाजार परिसरात एक, तर म्हार्दोळ - आकार परिसरात दुसऱ्या कुत्र्याने ही दहशत माजवली आहे. या कुत्र्यांचा संबंधितांनी त्वरित बंदोबस्त करावा अशी जोरदार मागणी म्हार्दोळ भागातील लोकांनी केली आहे.

राज्यात सध्या सगळीकडेच भटक्या कुत्र्यांनी उच्छाद मांडला आहे. रात्रीच्यावेळी तर दुचाकीस्वार तसेच अन्य कुणी पडण्याची सोयच उरलेली नाही. रात्रीच्यावेळी ही भटकी कुत्री नेमका दुचाकीस्वार तसेच एकटादुकटा चालत जात असल्याचे दिसल्यानंतर सरळ त्याच्या मागे लागतात. त्यामुळे अपघातांचे सत्रच सध्या सुरू आहे.

दरम्यान, वेलिंग प्रियोळ कुंकळ्ये पंचायतीचे सरपंच रणजीत प्रभुदेसाई यांनी या प्रतिनिधीशी बोलताना कुत्र्यांचा बंदोबस्त करण्यासाठी पंचायत प्रयत्नशील असल्याचे सांगितले.