ST Leaders In Goa

सध्या एसटी समाजाचे जे नेते राजकीय आरक्षणासाठी आंदोलने, निदर्शने करीत आहेत, त्यांच्यामध्येच विभाजन झाल्याचे दिसून येत असून प्रत्येकजण आपल्या पसंतीच्या राजकीय पक्षांना पाठिंबा जाहीर करू लागला आहे.

या लोकसभा निवडणुकीत दक्षिण गोवा मतदारसंघात तरी एसटी मतदारांवर भाजप, काँग्रेस व रिव्हॉल्युशनरी गोवन्स पक्ष अवलंबून आहेत. एसटी समाजातील नेत्यांची विभागणी नेमकी कुठल्या पक्षाच्या पथ्यावर पडणार आहे, हे पाहणे रंजक ठरणार आहे.

उटा संघटनेचे अध्यक्ष प्रकाश वेळीप हे सध्या भाजपच्या उमेदवार पल्लवी धेंपो यांचा प्रचार करीत आहेत. तर मिशन राजकीय आरक्षणाचे निमंत्रक ॲड. जॉन फर्नांडिस हे कॉंग्रेससोबत आहेत. रिव्हॉल्युशनरी गोवन्स पार्टीचे उमेदवार रुबर्ट परेरा यांनाही काही प्रमाणात एसटी समाजाची मते मिळणार आहेत. पण परेरा हे भाजप व कॉंग्रेसला दोष देत आहेत.

भाजपकडे तसे पाहिले गेल्याच एसटी नेत्यांची कमतरता नाही. यात स्वत: सभापती रमेश तवडकर, कला व संस्कृती मंत्री गोविंद गावडे, सावर्डेचे आमदार गणेश गावकर, माजी आमदार वासुदेव मेंग गावकर आणि प्रकाश वेळीप यांचा प्रामुख्याने समावेश आहे.

दक्षिण गोव्यात एसटी समाजाची सुमारे ५० हजार मते आहेत. मात्र, ही एकत्रित मते नाहीत. ही मते केपे, काणकोण, सांगे, फोंडा, सासष्टी व मुरगाव तालुक्यांमध्ये विभागली गेली आहेत. सासष्टी व मुरगावमध्ये ख्रिस्ती एसटी समाजाचा प्रभाव आहे. त्यामुळे एसटी समाजाची मते केवळ एकाच पक्षाला मिळण्याची शक्यता कमीच दिसते.

‘उटा’ पक्षांशी बांधील नाही!

प्रकाश वेळीप म्हणाले, उटा संघटना ही कुठल्याही पक्षाशी बांधील नाही. या संघटनेमध्ये वेगवेगळ्या विचारधारेचा अवलंब करणारे नेते व कार्यकर्ते आहेत. त्यामुळे उटा संघटनेतील नेत्यांवर व सदस्यांवर कोणत्या राजकीय पक्षाला द्यावा, याबद्दल कुठलेही बंधन घातलेले नाही.

एसटी समाजाला राजकीय आरक्षण देण्यास नाहक विलंब केला आहे, असे ‘मिशन राजकीय आरक्षण’चे निमंत्रक जॉन फर्नांडिस सांगतात. केंद्र सरकारने जे आश्र्वासन दिले आहे ते केवळ कागदावरच आहे. अद्याप प्रत्यक्षात त्याची प्रक्रिया सुरू झालेली नाही. त्यामुळे एसटी समाजातील लोक भाजपविरोधी मतदान करतील, असेही फर्नांडिस सांगतात.

यावेळी मी भाजपच्या उमेदवार पल्लवी धेंपो यांचा प्रचार करीत आहे. समाजातील बहुसंख्य लोक भाजपच्या उमेदवाराला पाठिंबा देतील. केंद्राने राजकीय आरक्षण देण्यासाठी प्रक्रिया सुरू केली आहे.

- प्रकाश वेळीप, अध्यक्ष, उटा संघटना.