Rahul Gandhi Goa Speech: 'गोवा बनले भ्रष्टाचाराचे केंद्र', राहुल गांधींचा भाजप सरकारवर जोरदार हल्लाबोल; खाणकाम, जमीन आणि बेरोजगारीचा प्रश्न ऐरणीवर

पणजी: काँग्रेस पक्षाचे ज्येष्ठ नेते राहुल गांधी यांनी गोव्यातील भाजप सरकारवर अत्यंत कडाडून टीका केली आहे. गोवा राज्य आज भ्रष्टाचाराचे प्रमुख केंद्र बनले असून, येथील भ्रष्टाचाराचे हेच प्रारूप आता भाजपशासित इतर राज्यांतही वापरले जात असल्याचा गंभीर आरोप त्यांनी केला आहे. राज्यातील खाणकाम, जमीन विक्री आणि वाढत्या बेरोजगारीच्या मुद्द्यावरून त्यांनी सरकारला धारेवर धरले.

सध्या गोव्यातील बेरोजगारीचा दर देशाच्या तुलनेत खूप जास्त आहे, त्यामुळे येथील हताश झालेला तरुण वर्ग रोजगाराच्या शोधात परदेशात जाण्यास मजबूर झाला आहे, असे राहुल गांधी (Rahul Gandhi) म्हणाले. पूर्वीच्या काळांत राज्याच्या सुनियोजित विकासासाठी एक ठोस 'मास्टर प्लॅन' अस्तित्वात होता; परंतु आज परिस्थिती पूर्णपणे बदलली आहे. गोमंतकीयांची कोट्यवधी चौरस मीटर जमीन पद्धतशीरपणे बाहेरील लोकांना विकली जात असून, यातून राज्याची मूळ संस्कृती आणि व्यवस्था नष्ट केली जात असल्याची भीती त्यांनी व्यक्त केली.

सरकारच्या चुकीच्या धोरणांमुळे गोव्याची अस्मिता धोक्यात आली असून, जनतेने याविरोधात एकत्र येण्याची वेळ आली आहे, असा इशाराही त्यांनी दिला. भाजप सरकारच्या काळात सर्वसामान्यांचे जीवन कठीण झाले असून, राज्याचे हित जपण्यासाठी सत्तेतील लोकांचा हा भ्रष्ट कारभार आता थांबवणे गरजेचे असल्याचे राहुल गांधी यांनी नमूद केले. गोव्याच्या या गंभीर स्थितीवर राजकीय वर्तुळात मोठी चर्चा सुरू झाली आहे.