फोंडा: भारत देशाला जागतिक पातळीवर इतर देशांकडून मिळणारा मान हा पंतप्रधान नरेंद्र मोदी यांच्या कल्पक नेतृत्वामुळे असून भारत देश विश्‍वगुरू व्हावा अशी मनिषा पंतप्रधानांनी व्यक्त केली असल्याने आपण सर्वांनी त्यांच्या संकल्पनेला सहकार्य करून देशाचे अखंडत्व कायम राखून अधिक उंचीवर नेण्यासाठी योगदान द्यायला हवे, असे उद्‌गार कृषीमंत्री रवी नाईक यांनी काढले.

(Distribution of national flag to students at ponda)

खडपाबांध - फोंडा येथील सभागृहात आज विद्यार्थ्यांना राष्ट्रध्वजाचे वितरण केल्यानंतर ते बोलत होते. यावेळी फोंडा पालिकेचे नगराध्यक्ष रितेश नाईक, नगरसेवक आनंद नाईक व अन्य नगरसेवकांसह भाजपचे कार्यकर्ते आणि विद्यार्थी व शिक्षकवर्ग उपस्थित होता.

रवी नाईक म्हणाले की, आपला देश हा सर्व जाती धर्मांना बरोबर घेऊन चालणारा देश आहे. आपल्या देशात सर्वधर्मसमभावाला महत्त्व आहे, त्यामुळेच सर्वजण मिळून मिसळून राहत असल्याने देशाच्या प्रगतीला ते पूरकच आहे. आपल्या देशाच्या विकासासाठी आणि देशबांधवांच्या हितासाठी सरकारकडून अनेक योजना आणि उपक्रम राबवले जात असून अशा योजना आणि उपक्रमांचा लाभ देशातील नागरिकांनी घ्यावा. नगराध्यक्ष रितेश नाईक यांनीही सर्वांना शुभेच्छा देताना देशाचे अखंडत्व अबाधित ठेवताना तिरंगा झेंड्याचा मान राखूया आणि देशाच्या विकासासाठी योगदान देऊया, असे आवाहन केले.