फोंडा: फोंडा (Ponda) येथील बरखास्त केलेली कॉंग्रेस (Congress) गट समिती व केंद्रीय कॉंग्रेसच्या सदस्यांनी बुधवारी सकाळी गोव्याचे (Goa) कॉंग्रेस प्रभारी दिनेश गुंडू राव (Dinesh Gundu Rao) यांची मडगावातील (Margao) एका हॉलमध्ये भेट घेऊन चर्चा केली. अचानक बरखास्त केलेल्या फोंडा कॉंग्रेस गट समितीच्या सर्व पदाधिकाऱ्यांशी चर्चा केल्यावर पुन्हा तीच समिती स्थापन करणार असल्याचे आश्‍वासन दिनेश गुंडू राव यांनी दिल्याची माहिती समितीचे अध्यक्ष अरुण गुडेकर यांनी दिली. (Dismissed Congress group committee in Ponda will be reconstituted)

बुधवारी सायंकाळी फोंडा येथील अंत्रुज शिमगोत्सव समितीच्या सभागृहात पत्रकार परिषदेत ते बोलत होते. यावेळी उपाध्यक्ष हुसेन मुल्ला, समितीचे माजी अध्यक्ष जॉन परेरा, पदाधिकारी किशोर नाईक, शब्‍बीर शेख, दिलीप नाईक, जोस रॉड्रिग्स, अचला वेरेकर, संगीता नाईक आणि कार्यकर्ते उपस्थित होते.

यावेळी जॉन परेरा म्हणाले, फोंडा कॉंग्रेस गट समिती बरखास्त झाल्याची माहिती मिळताच आम्हाला आश्‍चर्य वाटले. राज्यात कॉंग्रेस गट समिती उत्कृष्ट कार्य करीत असून आमच्या मागे मडगावचा नंबर लागत आहे. याबाबत आम्ही फोंड्याचे आमदार रवी नाईक यांना विचारणा केली असता, आपल्याला काहीच माहिती नसल्याचे त्यांनी सांगितले. नंतर एम. के. शेख यांच्याकडे विचारणा केली असता मला तसा आदेश आला असल्याचे त्यांनी सांगितले. बुधवारी कॉंग्रेस गट समितीने दिनेश गुंडू राव यांची भेट घेऊन सविस्तर माहिती कथन केली.

अध्यक्षपदी पुन्हा गुडेकर

आमदार रवी नाईक हे फोंडा कॉंग्रेस गट समितीला विश्‍वासात घेऊन काम करीत असल्याची माहिती परेरा यांनी दिली. फोंडा कॉंग्रेस गट समितीचे अध्यक्ष अरुण गुडेकर म्हणाले, कोणतेही कारण किंवा नोटीस न देता अचानक फोंडा कॉंग्रेस गट समिती बरखास्त करण्यात आली. यावर विचार विनिमय करून पुन्हा तीच समिती स्थापन करण्यात येणार असून मला गट समितीच्या अध्यक्षपदी नेमण्यात येणार आहे, असे गुडेकर म्हणाले.