पणजी: पणजीचे विद्यमान महापौर रोहित मोन्सेरात यांची महापौर पदाची एक वर्षाची मुदत 30 मार्च रोजी संपत आहे. त्यामुळे नव्या महापौरांच्या नावाची चर्चा सध्या सुरू झाली आहे. मात्र, पणजीत बाबूश मोन्सेरात कुटुंबीयांचे वाढलेले राजकीय वजन पाहता पुन्हा एकदा महापौर पदासाठी रोहित मोन्सेरात यांच्या नावावर शिक्कामोर्तब होण्याची शक्यता आहे.

माजी महापौर उदय मडकईकर, सुरेंद्र फुर्तादो यांनी आपण महापौरपदाच्या शर्यतीत नाही, असे यापूर्वीच जाहीर केल्याने पुन्हा एकदा महापौरपदी विराजमान होण्याचा रोहित मोन्सेरात यांचा मार्ग मोकळा झाला आहे, अशीच स्थिती आहे.

आदर्श आचारसंहिता मागे

देशभरात पाच राज्यांच्या निवडणुकांच्या पार्श्‍वभूमीवर केंद्रीय निवडणूक आयोगाने लागू केलेली आदर्श आचारसंहिता आज मागे घेण्यात आली. 8 जानेवारी रोजी लागू केलेली आचारसंहिता मागे घेण्यात आल्याची माहिती निवडणूक आयोगाचे वरिष्ठ प्रधान सचिव नरेंद्र बुटोलिया यांनी जारी केलेल्या पत्रकाद्वारे देण्यात आली आहे.

देशात गोव्यासह मणिपूर, उत्तर प्रदेश, उत्तराखंड आणि पंजाब येथील विधानसभेच्या निवडणुका झाल्या तसेच आसाम राज्यातील पोटनिवडणूकही पार पडली. उत्तर प्रदेश वगळता इतर राज्यांमध्ये 14 फेब्रुवारीला मतदान झाले होते आणि 10 मार्चला मतमोजणी पार पडली.