पणजी : दिगंबर कामत यांनी भाजपच्या स्थापनादिनानिमित्त सत्ताधारी पक्षाला शुभेच्छा दिल्या आहेत. कामत सपत्निक दिल्ली दौऱ्यावर आहेत. तेथे ते भाजप नेत्यांच्या संपर्कात असल्याची चर्चा आहे.

कामत यांना विश्‍वासात न घेता काँग्रेस पक्षश्रेष्ठींनी विधिमंडळ आणि प्रदेश काँग्रेस पक्षाच्या नेत्यांची निवड केली आहे. कामत यांना डावलून माजी प्रदेशाध्यक्ष गिरीश चोडणकर यांना दिल्लीला बोलवून घेण्यात आले. पक्षाचे गोवा प्रभारी दिनेश गुंडूराव व चोडणकर यांनी परस्पर गोव्याच्या नेतृत्वबदलाचा आलेख लिहिला. या प्रकारामुळे कामत कमालीचे नाराज व अस्वस्थ आहेत.

दोन दिवसांपूर्वी पक्ष कार्यकर्त्यांच्या एका गटापुढे बोलताना कामत यांनी आपल्याला डावलल्याची भावना व्यक्त केली होती. कामत यांनी आपल्या विश्‍वासू सहकाऱ्यांना नाराजीची कल्पना दिली आहे. ज्या पक्षात मान नाही त्या पक्षात तुम्ही राहू नका, असा सल्ला त्यांना कार्यकर्त्यांनी दिला.

मडगावमधील कामत यांच्या विश्‍वासू सहकारी व मित्रांनीही समाजमाध्यमांवर चर्चा करताना कामत हे काँग्रेस (Congress) सोडून जाऊ शकतात, अशा भावना व्यक्त केल्या आहेत. दुसऱ्या बाजूला कामत यांनी निवडणुकीपूर्वी इतर उमेदवारांसह राज्यातील देवस्थानांना भेटी दिल्या होत्या. कोणत्याही परिस्थितीत आम्ही पक्ष सोडणार नाही, अशा आणाभाका यावेळी घेण्यात आल्या होत्या. त्यामुळे देवाला मानणारे दिगंबर कामत (Digambar Kamat) कोणत्याही परिस्थितीत असा विश्‍वासघात करणार नाहीत, अशी प्रतिक्रियाही समाजमाध्यमांत फिरत आहे.

कामत यांनी दिल्लीत गृहमंत्री अमित शाह यांच्याशी संपर्क साधल्याची चर्चा आहे. स्थानिक पातळीवर मात्र नेत्यांना कोणतीही माहिती नाही. निवडणुकीच्या काळात पक्षश्रेष्ठींनी परस्पर निर्णय घेताना भाजप (BJP) नेतृत्वाला अंधारात ठेवले होते. सध्याही मंत्रिमंडळात तीन जागा रिकाम्या आहेत, त्याबाबत दिल्लीत निर्णय घेतला जात असल्याचे स्थानिक नेत्यांचे म्हणणे आहे.