पणजी : साखळी मतदारसंघातील काँग्रेसचे ज्‍येष्‍ठ नेते धर्मेश सगलानी यांना एका कथित जुन्‍या खंडणी प्रकरणी आगशी पोलिसांनी ताब्‍यात घेतले आहे. नुकत्‍याच संपलेल्‍या विधानसभा निवडणुकीच्‍या काळापासून सगलानी यांच्‍याभोवती हा पोलिसांचा ससेमिरा लागला आहे.

साखळी मतदारसंघातून विधानसभेची निवडणूक लढवताना धर्मेश सगलानी (Dharmesh Saglani) यांनी भाजपचे प्रतिस्‍पर्धी उमेदवार मुख्‍यमंत्री डॉ. प्रमोद सावंत यांना घाम फोडला होता.

काही राजकीय विश्‍‍लेषकांनी तर साखळीत (Sanquelim) सगलानीच बाजी मारून ‘किंग मेकर’ ठरणार असल्‍याचे भाष्‍य केले होते. त्‍यांना मतदारसंघात मिळणार प्रतिसाद पाहिल्‍यास अनेकजण त्‍यांच्‍या विजयाची खात्री व्‍यक्त करत होते. मतमोजणी दिवशीही सगलानी यांनी पहिल्‍या टप्‍प्‍यात सावंत यांना पिछाडीवर टाकले होते. पण नंतर जोरदार मुसंडी मारत प्रमोद सावंत (Pramod Sawant) यांनी अवघ्‍याच मतांनी सगलानी यांचा पराभव केला होता. पण या निवडणुकीच्‍या काळापासूनच सगलानी हे कथित खंडणी प्रकरणी पोलिसांच्‍या (police) निशाण्‍यावर आले होते. आज पुन्‍हा एकदा त्‍यांना आगशी पोलिसांनी ताब्‍यात घेतले असून गुन्‍हा शाखेच्‍या कार्यालयात चौकशी होण्‍याची शक्‍यता आहे.