काणकोण: पैंगीण पंचायतीच्या रविवार झालेल्या ग्रामसभेत पोटके क्रीडा मैदान, कचरा प्रक्रिया प्रकल्पावर चर्चा झाली. पंचायत क्षेत्रातील पोटके क्रीडा मैदानाचा विकास तीन कोटी रूपये खर्चून आदिवासी कल्याण योजनेखाली करण्यात येणार आहे. त्यासबंधीची फाईल खात्याकडे निविदा जारी करण्यासाठी पाठविण्यात आली आहे. याबाबत सभापती रमेश तवडकर यांच्याशी पंचायत मंडळाने चर्चा केली आहे, असे पंच प्रवीर भंडारी यांनी ग्रामसभेत सांगितले.

ग्रामसभेने पंचायत सदस्य भंडारी यांच्या अध्यक्षतेखाली पोटके क्रीडा मैदान विकास समिती स्थापन केली होती. या समितीने प्रयत्न करून ही जमीन पैंगीण पंचायतीच्या नावावर करून घेतली. मात्र, जमीन नावावर नसताना अनेकदा या मैदानाची पायाभरणी झाली. ग्रामसभेत सभापती तवडकर यांच्या सहकार्याने आदिवासी कल्याण खात्याच्या तीन कोटी अर्थ सहाय्याने मैदानाचा पहिल्या टप्प्यात विकास करण्याचे मत माजी उपसरपंच सतीश पैगीणकर तसेच व्यंकटराय नाईक यांनी व्यक्त केले.

यावेळी दीपक बोवाळकर व सुनिल गावकर यांनी सार्वजनिक जैवविविधता अहवालासबंधी दृक श्राव्य माध्यमातून माहिती दिली.

कचरा प्रकल्प स्थलांतर लवकरच !

पंचायतीचा कचरा प्रक्रिया प्रकल्प ज्या जागी उभारण्यात आला आहे, तो स्थलांतरीत करून त्या जागेबद्दल पर्यायी 15 हजार चौरस मीटर जागा उपलब्ध करून देण्याचे पैंगीण कोमुनिदाद संस्थेच्या पदाधिकाऱ्यांनी ग्रामसभेत सांगितले होते. त्याप्रमाणे नऊ हजार चौरस मीटर जागा कोमुनिदाद संस्थेने पंचायतीला दिली आहे. मात्र, अद्याप सहा हजार चौरस मीटर जमिनीसंदर्भात चर्चा चालू असल्याचे पंच सदस्यांकडून सांगण्यात आले.