Girish Chodankar: कॉंग्रेस पक्षाने चार राज्यांचे प्रभारीपद दिले, याचा अर्थ मी लोकसभा लढवण्यासाठी इच्छुकांच्या यादीतून बाहेर गेलो, असा होत नाही. मणिकम टागोर यांच्यासह काही खासदारांकडेही पक्षाने राज्य प्रभारीपद सोपवले याकडे दुर्लक्ष नको, असे त्रिपुरा, सिक्कीम, मणिपूर आणि नागालॅण्ड या राज्यांचे प्रभारीपद मिळालेल्या गिरीश चोडणकर यांनी ‘गोमन्तक’ला सांगितले.

चोडणकर म्हणाले की, पक्षाने मला लोकसभा निवडणूक लढवा, असे सांगितले तर मी निवडणूक लढवण्यास आजही तयार आहे. प्रभारीपद आणि लोकसभा निवडणुकीची उमेदवारी याचा संबंध नाही. पक्षाने एकाचवेळी चार राज्यांचे प्रभारीपद माझ्याकडे सोपवून मोठी जबाबदारी दिली, याबद्दल मी पक्षाचा आभारी आहे. आताच मला आदेशाची प्रत मिळाली.

पक्षाचा माझ्यावर मोठा विश्‍वास

चोडणकर म्हणाले की, ईशान्येकडील राज्यांत यापूर्वी लुईझिन फालेरो यांनीही काम केले होते. त्यानंतर तशी संधी मला मिळाली आहे. पक्षाने माझ्यावर मोठा विश्वास टाकला आहे. तो सार्थ ठरवण्याचा माझा प्रयत्न राहील. यामुळे माझे मन भारावून गेले आहे. वर्षातच मी त्या राज्यांच्या दौऱ्यावर जाणार आहे.