Goa Ration Card Holder : नागरी पुरवठा आणि ग्राहक व्यवहार विभागातर्फे सर्व सरकारी सेवकांना आणि सामान्य जनतेला 15 मे 2023 पर्यंत त्यांच्या रेशन कार्डमध्ये आवश्यक बदल करण्याचे आवाहन करण्यात आले आहे.

यासाठी रेशन कार्डधारकांना अर्ज दाखल करण्याचे सांगण्यात आले असून यासंदर्भात नोटीस जारी करण्यात आली आहे.

जारी केलेल्या नोटीसनुसार, सर्व सरकारी अधिकारी आणि सामान्य जनतेला आपल्या रेशन कार्डमध्ये आवश्यक बदल करण्यास त्वरित अर्ज करण्यास सांगितले आहे. यासंदर्भात, सर्व सरकारी सेवकांना आणि सामान्य जनतेने ज्यांचे कौटुंबिक उत्पन्न 50,000 रु.च्या वर असल्यास त्यांनी त्यांचे रेशन कार्ड AAY (अंत्योदय अन्न योजना) किंवा PHH (प्राधान्य कुटुंब योजना) वरून APL (दारिद्र्यरेषेच्या वर) कार्डमध्ये बदलण्यासाठी अर्ज करणे गरजेचे आहे.

तसेच ज्यांचे कौटुंबिक उत्पन्न रु.5,00,000 पेक्षा कमी आहे त्यांनी विभागीय फॉर्म C भरावा. तर ज्यांचे कौटुंबिक उत्पन्न रु.5,00,000 पेक्षा जास्त आहे त्यांनी विभागीय फॉर्म D भरून आपली शिधापत्रिका संबंधित तालुका नागरी पुरवठा कार्यालयात जमा करावी.

वरील सर्व कामांसाठी 15 मे 2023 पर्यंत अर्ज करणे अनिवार्य असणार आहे. याबाबत, नागरी पुरवठा कार्यालयातील अधिकाऱ्यांनी पडताळणी केली किंवा यासंदर्भात कोणत्याही प्रकारची तक्रार दाखल झाली तर संबंधित रेशन कार्डधारकावर कडक कारवाई करण्यात येणार असल्याचे सांगण्यात येत आहे.