सामना संपण्यास पाच मिनिटे बाकी असताना बदली खेळाडू साईश बागकर याने नोंदविलेल्या गोलमुळे धेंपो स्पोर्टस क्लबला द्वितीय विभागीय फुटबॉल स्पर्धेत ‘ड’ गटातील मोहिमेची सांगता विजयाने करता आली. गुरुवारी एला-जुने गोवे येथे झालेल्या लढतीत त्यांनी हैदराबाद एफसीच्या राखीव संघावर 1-0 अशी निसटती मात केली.

सामन्याच्या 65व्या मिनिटास प्रशिक्षक समीर नाईक यांनी व्हिएरी कुलासो याच्या जागी साईशला संधी दिली, अखेरीस तो संघासाठी ‘सुपर सब’ ठरला. धेंपो क्लबने आठ सामन्यांतील चौथा विजय नोंदवला. त्यांचे 14 गुण झाले व पाच संघांच्या गटात तिसरा क्रमांक मिळाला. हैदराबाद संघाला सहावा पराभव पत्कारावा लागला. त्यांचे एफसी गोवा राखीव संघाइतकेच चार गुण झाले.

या गटातील अन्य एका साखळी सामन्यात अहमदाबाद येथे गुरुवारी अंबरनाथ युनायटेड संघाने यजमान एआरए एफसी संघाला 2-1 फरकाने धक्का दिला. इंज्युरी टाईमच्या सहाव्या मिनिटास गोल स्वीकारल्यामुळे एआरए संघाला स्पर्धेत पहिलाच पराभव पत्करावा लागला. स्पर्धेत प्रत्येकी आठ सामने खेळल्यानंतर या दोन्ही संघांचे प्रत्येकी १७ गुण झाले.