पणजी: राज्यात (Goa) आतापर्यंत डेल्टा व्हेरियंटचे (Delta variant) 173 रुग्ण मिळाल्याची नोंद झाली आहे. रविवारी 69 नमुन्यांचे अहवाल मिळाले असून त्यातील 64 अहवाल हे डेल्टा व्हेरियंट आहेत. आतापर्यंत एकही डेल्टा प्लसचा अहवाल नाही ही गोव्‍यासाठी दिलासा देणारी बाब आहे, परंतु डेल्टाच्या संख्येत वाढ झाली, तर चिंता वाढू शकते. पुण्यातील प्रयोगशाळेने मे व जूनमध्ये पाठवलेल्या सॅंपल्सचे अहवाल बरेच उशिरा दिल्यामुळे या 173रुग्णांतील बहुतांश रुग्ण बरे झाले, तर काही दगावले आहेत. यावरून गोवा आरोग्य खात्याची असे विषाणू तपासण्याची स्वतःची प्रयोगशाळा नसल्याने अहवालांना कशी दिरंगाई होते हे स्पष्ट झाले आहे. (Delta's 64 patients tested positive in Goa)

दरम्यान, पुणे येथील प्रयोगशाळेत डेल्टा व्हेरियंटच्या विषाणूंची चाचणी करण्यासाठी गोव्यातून एकूण 184 नमुने पाठवले होते. त्यातील 115 सॅंपल्सचा अहवाल यापूर्वी दोन टप्प्यात मिळाला होता. ज्यात 100 डेल्टा व्हेरियंट व 9 कापाचे रुग्ण आढळले होते. उर्वरीत 69 सॅंपल्सचा अहवाल आज आरोग्य खात्याला मिळाला.

रविवारी एक बळी, 69 नवे रुग्ण

रविवारी कोरोनामुळे एकाचा मृत्यू झाला. 69 नवे रुग्ण आढळून आले. रविवारी 4,867 चाचण्या करण्यात आल्या. राज्यात सध्या बरे होण्याची टक्केवारी 97.57 इतकी असून पॉझिटिव्हिटी दर 1.42 टक्के इतका आहे. राज्यात आतापर्यंत 3,160 बळींची नोंद झाली आहे.

10 लाख लोकांना पहिला डोस

7 ऑगस्टपर्यंत राज्यातील एकूण लसीकरण 13,58,675 झाले असून त्यात 10,65,696 नागिरकांनी पहिला डोस, तर 2,92,808 नागरिकांनी दोन्ही डोस घेतले आहेत. राज्यात 18 वर्षांवरील 11 लाख 90 हजार नागरिक असून त्यातील 10 लाख 65 हजार 969 लोकांनी पहिला डोस घेतला आहे.