Mapusa Police Arrest Fourth Member of Sextortion Gang in Delhi

म्हापसा: सेक्सटॉर्शनचा वापर करून अनेक धनाढ्य लोकांना लुटणाऱ्या टोळीतील चौथ्या संशयिताला म्हापसा पोलिसांनी दिल्लीतून शिताफीने अटक केली. विशेष म्हणजे, या टोळीने भागीदारीमध्ये खंडणीच्या पैशांतून दिल्लीत रेस्टॉरंट उघडले आहे. अधिकतर व्हाईट कॉलर व्यावसायिकांना टोळी सावज बनवायची, असे पोलिस तपासातून समोर आले आहे.

दिल्ली नार्कोटिक ब्युरोचे अधिकारी असल्याचे भासवून एका व्यावसायिकाचे सेक्सटॉर्शन करून आर्थिक मोबदल्यासाठी फिर्यादीला ब्लॅकमेल करणाऱ्या टोळीतील अटक केलेल्या चौथ्या संशयिताचे नाव मोहम्मद बशीद खान (दिल्ली) असे असून, त्याला स्थानिक न्यायालयाने पाच दिवसांची पोलिस कोठडी सुनावली आहे. याप्रकरणात आणखीन काहींचा सहभाग असून पोलिस संशयितांचा शोध घेत आहेत.

दरम्यान, अटक केलेला चौथा संशयित मोहम्मद हा देश सोडून पलायनाच्या तयारीत असताना, म्हापसा पोलिसांनी त्याला दिल्लीतून सापळा रचून अटक केली. लुबाडणुकीचा हा प्रकार ऑगस्ट २०२३मध्ये घडला होता. फिर्यादीच्या म्हापशातील बंगल्यावर काही संशयितांनी फिर्यादीस दिल्लीतील अमली पदार्थ विभागाचे अधिकारी असल्याचे भासवून मारहाण करीत, नंतर त्याच्याकडून पैसे उकळले होते. याप्रकरणात म्हापसा पोलिसांनी भादंसंच्या कलम ३४२, १७०, ३२३, ५०६(२), ३८९ व ३४ अन्वये गुन्हा नोंद केला होता.

अवैध मार्गाने उदरनिर्वाह

व्यावसायिकाकडून ३० लाख रुपये खंडणी उकळल्याप्रकरणात म्हापसा पोलिसांनी यापूर्वी तिघांना अटक केली होती. ज्यामध्ये निवेदिता शर्मा, फैजान खान, भुवन अरोरा यांचा समावेश होता. या सेक्सटॉर्शनमध्ये मुलींचा वापर करून श्रीमंत व्यावसायिकांना लक्ष्य करण्याचे काम ही टोळी करायची. विशेष म्हणजे, ही टोळी सेक्सटॉर्शनच्या माध्यमातूनच आपला उदरनिर्वाह करत असल्याचे पोलिसांच्या तपासामध्ये आढळले आहे.