वाळपई, ता. ११ (वार्ताहर) : वाळपई, ठाणे मार्गावरील मुख्य रस्त्यावर पाण्याच्या चेंबरला गेल्या महिन्यापासून गळती लागली होती व त्याचा अंदाज येत नसल्याने अनेक अपघात होत होते.

त्यातच एक महिला पडून जखमी झाली होती. यासंदर्भात, काही दुकानदारांनी संबंधित खात्याकडे दुरुस्ती संबंधी तक्रार सुध्दा केली होती. मात्र त्याची दखल कुणीच घेतली नाही. मात्र ‘गोमन्तक’ चे वृत्त समाजमाध्यमावर झळकताच खात्याला जाग आली.

रविवारी त्या गळती लागलेल्या चेंबरचे दुरुस्ती करण्यात आली. चेंबरला गळती लागल्यामुळे पाण्याची सुध्दा नासाडी होत होती. हा चेंबर मुख्य बाजारात असल्याने येथे मोठे खड्डेही पडले होते. त्यामुळे वाहनचालकांना प्रचंड त्रास होत होता. चेंबर्सचे दुरुस्तीचे काम हाती घेण्यात आल्यामुळे नागरिकांनी समाधान व्यक्त केले.