पणजी : जेथे प्रेम जास्त असते, तेथे भांडणे अधिक असतात. विद्यमान मंत्री रमेश तवडकर आणि माजी मंत्री गोविंद गावडे यांच्यातील वाद संपला आहे. या दोन्ही नेत्यांशी आपली चर्चा झाली आहे, असे भाजप प्रदेशाध्यक्ष दामू नाईक यांनी मंगळवारी पत्रकारांशी बोलताना सांगितले.
भाजप नेते रमेश तवडकर आणि गोविंद गावडे यांच्यात गेल्या काही वर्षांपासून विविध कारणांवरून शाब्दिक चकमकी झडत आहेत. सभापती असताना तवडकर यांनी काणकोणातील संस्थांना कला-संस्कृती खात्याकडून योग्य पद्धतीने अनुदान मिळत नसल्याचा आरोप केला होता. त्यावेळी त्या खात्याचे मंत्री होते गोविंद गावडे.
त्यानंतर गावडे यांनीही प्रत्युत्तर दिले होते. हा वाद अनेक दिवस सुरू राहिला. त्यानंतर गत पावसाळी अधिवेशनाच्या काही दिवस आधी पक्षशिस्तीचे उल्लंघन केल्याचा ठपका ठेवत मुख्यमंत्री डॉ. प्रमोद सावंत यांनी गोविंद गावडे यांना मंत्रिमंडळातून वगळून त्यांच्या जागी तवडकर यांची वर्णी लावली.
त्यानंतर काही दिवसांपूर्वी घेतलेल्या पत्रकार परिषदेत तवडकर यांनी गावडेंवर पुन्हा हल्लाबोल चढवला. त्यालाही गावडेंनी उत्तर दिले. मंत्री तवडकर राबवत असलेल्या ‘श्रमधाम’ योजनेवरूनही गावडेंनी तोफ डागली. या दोन्ही नेत्यांतील वादामुळे भाजपच्या वरिष्ठ नेत्यांमध्ये अस्वस्थता पसरली होती.
या पार्श्वभूमीवर प्रदेशाध्यक्ष दामू नाईक यांना पत्रकारांनी छेडले असता, तवडकर-गावडेंमधील वाद संपुष्टात आला आहे. आपण या दोन्ही नेत्यांशी चर्चा केली आहे, असे त्यांनी सांगितले. जेथे प्रेम जास्त असते, तेथे भांडणे अधिक होतात, अशी पुस्तीही त्यांनी जोडली.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.