वास्को: श्री दामोदर भजनी सप्ताहाला शनिवारी (ता. १०) सकाळी प्रारंभ होणार आहे. यंदा सप्ताहाचे शतकोत्तर रौप्य महोत्सव वर्ष असल्याने विविध धार्मिक व सांस्कृतिक कार्यक्रमांना ७ तारखेपासूनच सुरवात झाली.

सप्ताहानिमित्त स्वतंत्र पथ व सेंट जोसेफ वाझ मार्गावर फेरीची दुकाने थाटली आहेत. भाविकांची गैरसोय होऊ नये, यासाठी श्री दामोदर भजनी सप्ताह (बाजारकर) समिती, पोलिस दल, वाहतूक पोलिस, शहर आरोग्य विभाग, साबांखा, वीज विभाग, मुरगाव पालिका, उपजिल्हाधिकारी, मामलेदार कार्यालय व इतर संबंधित सरकारी यंत्रणा दक्ष आहेत.

जोशी कुटुंबीयांतर्फे श्रींना श्रीफळ : शनिवार, १० रोजी दुपारी १२.३० वाजता श्रीचरणी जोशी कुटुंबीयांतर्फे श्रीफळ ठेवल्यानंतर अखंड २४ तास भजनी सप्ताहाची सुरवात होणार आहे. भजनी कलाकार अशोक मनोहर मांद्रेकर यांच्या ‘जय जय राम कृष्ण हरी’ गजराने सप्ताहास सुरुवात होणार आहे. रविवार, ११ रोजी दुपारी १२.३० वा. गोपाळ काल्याने सप्ताहाची सांगता होईल.