पणजी: दाबोळी आंतरराष्ट्रीय विमानतळावरून दुबईला जाणाऱ्या प्रवाशांसाठी दिलासादायक बातमी आहे. एअर इंडिया एक्स्प्रेसने हिवाळी २०२६ हंगामासाठी प्रस्तावित केलेल्या आंतरराष्ट्रीय उड्डाणांच्या वेळापत्रकात दाबोळी-दुबई विमानसेवा पुन्हा सुरू करण्याचा प्रस्ताव ठेवला आहे. या मार्गावर आठवड्याला सात, म्हणजेच दररोज एक विमानसेवा उपलब्ध होण्याची शक्यता आहे.

त्यामुळे दाबोळी विमानतळाची दुबईशी असलेली दैनंदिन आंतरराष्ट्रीय हवाई जोडणी पुन्हा पूर्ववत होणार आहे. एअर इंडिया एक्स्प्रेसने हिवाळी हंगामासाठी आंतरराष्ट्रीय नेटवर्कमध्ये विविध बदल प्रस्तावित केले आहेत. यामध्ये नवीन आंतरराष्ट्रीय मार्ग सुरू करण्याबरोबरच काही बंद मार्गांवरील सेवा पुन्हा सुरू करणे आणि मागणीच्या आधारे काही मार्गांवरील उड्डाणांची संख्या वाढविण्याचे नियोजन आहे. त्याचाच एक भाग म्हणून गोवा-दुबई मार्गावरील दैनंदिन सेवा पुन्हा सुरू करण्याचा प्रस्ताव आहे.

उन्हाळी वेळापत्रकात अपेक्षेइतका प्रवासी प्रतिसाद मिळाला नसल्याने हंगामाच्या मध्यावर काही सेवा कमी करण्यात आल्या होत्या. मात्र, हिवाळी हंगामात प्रवासी मागणी वाढण्याची शक्यता लक्षात घेऊन दुबई मार्गावरील सेवा पुन्हा वाढविण्याचे नियोजन करण्यात आले आहे. मुंबई-गोवा मार्गावरही एअर इंडिया समूहाने मोठी क्षमता वाढविण्याचे नियोजन केले आहे. २५ ऑक्टोबरपासून लागू होणाऱ्या प्रस्तावित वेळापत्रकानुसार मुंबईहून गोव्याला दिवसाला आठपर्यंत उड्डाणे चालविण्याची योजना आहे.

अंतिम वेळापत्रकाची प्रतीक्षा

एअर इंडिया एक्स्प्रेसचे हिवाळी २०२६ वेळापत्रक अद्याप प्रस्तावित असून त्यात पुढील काळात बदल होण्याची शक्यता आहे. त्यामुळे दोन्ही मार्गांवरील उड्डाणांची अंतिम संख्या आणि वेळा विमान कंपनीकडून नंतर निश्चित केल्या जाणार आहेत.