वास्को: दाबोळी आंतरराष्ट्रीय विमानतळाच्या अरायव्हल गेट-२ च्या गोदामामध्ये (स्टोअर रूम) शॉट सर्किटमुळे अचानक आग लागल्याने विमानतळावरील सर्व टर्मिनल काही वेळ बंद ठेवण्यात आले होते.

आग आटोक्यात आणल्यानंतर काही वेळाने सर्व टर्मिनल सर्वसामान्यांना खुली करण्यात आल्याची माहिती विमानतळ प्राधिकरणामार्फत सांगण्यात आले. गोदामात लागलेली आग विमानतळावरील कामगारांनी आटोक्यात आणली. आग लागल्याने मोठी दुर्घटना घडली नसली तरी स्टोअर रूममधील सर्व विजेचे साहित्य जळून खाक झाले.

दाबोळी आंतरराष्ट्रीय विमानतळावर शनिवार (ता. ११) रोजी सकाळी ११.३० वाजता विमानतळाच्या स्टोअर रूममध्ये आग लागल्याने एकच तारांबळ उडाली. विमानतळावर विजेचे साहित्य ठेवणाऱ्या स्टोअर रूममध्ये शॉट सर्किटमुळे आग लागली. आग लागताच विमानतळावर कामावर असलेल्या कामगारांनी त्वरित नियंत्रण आणले.

कर्मचाऱ्यांची तत्परता

कर्मचाऱ्यांनी दाखविलेल्या तत्परतेमुळे आग इतरत्र पसरली नाही. अन्यथा, मोठी दुर्घटना घडली असती. कर्मचाऱ्यांच्या या प्रसंगावधानाबद्दल त्यांचे कौतुक केले जात आहे.