पणजी: दाबोळी येथील गोवा आंतरराष्ट्रीय विमानतळ सध्या दररोज सुमारे १३ हजार प्रवाशांची हाताळणी करीत असून, दिवसाला ८० ते ८४ विमानांची ये-जा होत आहे. प्रवासीसंख्या आणि विमानफेऱ्यांमध्ये सातत्याने वाढ होत असल्याने दाबोळी विमानतळाची आर्थिक स्थितीही भक्कम असून, विमानतळाला सध्या सुमारे १३५ ते १३७ कोटी रुपयांचा नफा होत असल्याची माहिती भारतीय विमानतळ प्राधिकरणाचे (एएआय) दाबोळी विमानतळ संचालक फ्लाइट लेफ्टनंट आकाश दीप यांनी दिली.

दाबोळीवरील प्रवासी संख्येत गेल्यावर्षीच्या तुलनेत घट झाल्याचे वृत्त ‘गोमन्तक’ने दिले. त्या पार्श्वभूमीवर दीप माध्यमांशी बोलत होते. दाबोळी विमानतळावरील सध्याच्या विमान वाहतुकीबाबत माहिती देताना आकाश दीप यांनी सांगितले की, विमानतळावर दररोज सुमारे १३ हजार प्रवाशांची ये-जा होत आहे. त्यासाठी दररोज ८० ते ८४ विमानांच्या फेऱ्या होत आहेत. पर्यटन हंगामाच्या पार्श्वभूमीवर आगामी हिवाळी वेळापत्रकात विमानसेवांमध्ये आणखी वाढ होण्याची अपेक्षा आहे.

हिवाळी वेळापत्रकात सुमारे दहा अतिरिक्त विमानफेऱ्या दर आठवड्याला वाढण्याची शक्यता आहे. त्यामुळे आगामी काळात दाबोळी विमानतळावरील विमान वाहतूक आणि प्रवासीसंख्येत वाढ होण्याची अपेक्षा आहे. याशिवाय ‘फ्लाय ९१’ या विमान कंपनीची सेवाही लवकरच सुरू होण्याची शक्यता असल्याचे दीप यांनी सांगितले.

१३५ कोटी रुपयांचा नफा

प्रवासी हाताळणीबरोबरच विमानतळाच्या आर्थिक कामगिरीतही दाबोळीने समाधानकारक स्थिती कायम ठेवली आहे. सध्या विमानतळाला सुमारे १३५ ते १३७ कोटी रुपयांचा नफा होत असल्याचे आकाश दीप यांनी स्पष्ट केले. त्यामुळे वाढती विमान वाहतूक, प्रवासीसंख्या आणि नव्या विमान कंपन्यांच्या सेवांमुळे दाबोळी विमानतळाचे महत्त्व कायम असल्याचे चित्र आहे.