अनिल पाटील

रोगमुक्त आणि तंदुरुस्त राहण्याबरोबर निसर्गाच्या जवळ जाण्याचा सर्वोत्तम उपाय म्हणजे सायकल चालवणे होय. सायकल चालवण्याच्या छंदासाठी विशेष काही खर्चही येत नाही आणि प्रदूषणही होत नाही. म्हणून सर्वांनी दिवसाकाठी 30 ते 40 किलोमीटर सायकल चालवलीच पाहिजे, असे मत मुकुंद कडुसकर यांनी मांडले आहे.

72 वर्षीय कडूसकर आपल्याच वयाच्या जयंत रिसबूड या मित्राला घेऊन पुण्यावरून कराड, कोल्हापूर, कोकणचा आस्वाद घेत 14 दिवसांत 793 किलोमीटरचा प्रवास करून गोव्यात पोहोचले आहेत. निवृत्तीनंतर आराम करत देवदर्शन करत आयुष्य जगण्याकडे अनेकांचा कल असतो. मात्र, ही मानसिकता बाजूला सारत समाजाच्या प्रति आपण काहीतरी देणे लागतो, ही धारणा मनात ठेवून या वयात तरुणांना लाजवेल, असा सायकल प्रवास करत ही मंडळी सफर करत आहेत.

सह्याद्रीच्या कुशीतील लोक प्रेमळ-

सह्याद्री हा जागतिक वारसा स्थळ आहे. यासाठी वेगवेगळ्या प्रकारचे जल, पाणी, आणि वायू प्रदूषण कमी केले पाहिजे. यासाठी सायकलचा जास्तीत जास्त वापर केला पाहिजे, असे सांगत कडूसकर म्हणाले, आम्हाला प्रवासामध्ये भेटलेली माणसे ही इथल्या निसर्गाप्रमाणेच रसाळ गोमटी, माणुसकीवर प्रेम करणारी आहेत, याचा अनुभव आला, असे त्यांनी सांगितले.

गडकिल्ल्यांवर भ्रमंती: अबूधाबीमधील प्रिंटिंग प्रेस कंपनीतून निवृत्त झाल्यानंतर कडूसकर पुण्यात स्थायिक झाले. त्यांना लहानपणापासूनच सायकलींगचा छंद होता. पुण्यात त्यांना कमिन्समधून निवृत्त झालेले सायकलवेडे रिसबूड भेटले. मग दोघांची घट्ट मैत्री झाली आणि सुरू झाली गडकिल्ल्यांवर सायकल भ्रमंती.