Goa Increase in Cyber Crime: राज्यात गेल्या 27 महिन्यांत 106 सायबर गुन्हे नोंद झाले आहेत. डिजिटल व्यवहारांत वाढ झाल्याने अनेकजण ऑनलाईन आमिषांना बळी पडत आहेत. गेल्यावर्षी 2022 मध्ये 70 तर यावर्षी आतापर्यंत 13 सायबर गुन्ह्यांची प्रकरणे नोंद झालेली आहेत.

सायबर गुन्हे कक्षाकडे अधिक तर दाखल झालेल्या प्रकरणांमध्ये ऑनलाईन फसवणूक, फेसबुकवर तोतयेगिरी, विवाह नोंदणी, नोकरी किंवा बक्षीस लागल्याची बोगस माहिती देऊन लुबाडण्‍याची प्रकरणे नोंद झाली आहेत.

अनेकजण फसविले गेल्याचा अंदाज आल्यानंतर ही प्रकरणे कक्षाकडे नोंद करत आहेत. 2021 मध्ये सुरूवातीला 23 प्रकरणे दाखल झाली होती, मात्र 2022 मध्ये ही संख्या 70 वर पोहोचली. यंदा मार्चपर्यंत 13 प्रकरणांची नोंद झाली आहे, अशी माहिती गृहमंत्री डॉ. प्रमोद सावंत यांनी आमदार विजय सरदेसाई यांनी विचारलेल्या अतारांकित प्रश्‍नावर बोलताना दिली.

देशाबाहेरील प्रकरणांपर्यंत पोचणे कठीण

सायबर गुन्हे कक्षात निरीक्षक व उपनिरीक्षकासह 8 कॉन्स्टेबल मिळून एकूण 10 पोलिस कर्मचारी आहेत. या कक्षाकडे अत्याधुनिक तांत्रिक यंत्रणा असल्याने अनेक प्रकरणांचा पर्दाफाश करून संशयितांपर्यंत पोहोचण्यात यश आले आहे.

ज्या प्रकरणांमध्ये ऑनलाईन फेसबुक व ॲपचा स्रोत भारताबाहेर आहे, त्यांच्यापर्यंत पोचण्याची शक्यता अंधुकच असते. ऑनलाईन पैसे पाठविण्यासाठी ज्या बँकांची खाती देण्‍यात येतात, ती बोगस तयार केलेली असतात.

त्यामुळे तपासकामावेळी झालेल्या रकमेचा व्यवहार शोधून काढण्यास कठीण जाते, अशी माहिती वरिष्ठ पोलिस अधिकाऱ्यांनी दिली.