मडगाव : साळ नदीत रेतीचे पट्टे तयार होऊन गाळ वाढल्‍यामुळे मच्‍छीमारी बोटींना या नदीतून येण्‍यासाठी त्रास होतो, अशा आशयाच्‍या तक्रारी मागची कित्‍येक वर्षे चालू असतानाच काल मासेमारी करून परतताना आणखी एक मच्‍छीमारी बोट या गाळात रुतून पडली.

यामुळे इतर बोटींच्‍या हालचालीवर मर्यादा आल्‍या असून साळ नदीत वाढलेला हा रेतीचा गाळ काढून बोटीसाठी मार्ग मोकळा करावा, नदीतील गाळ काढावा, अशा या मागणीने पुन्‍हा एकदा जोर धरला आहे.

काल कुटबण जेटीजवळून काही अंतरावर ही दुर्घटना घडली. मासेमारी करून ही बोट परत येत असताना ती गाळात रुतली, शेवटी दुसरी बोट आणून या बोटीतील मासे आणि माणसांना बाहेर काढण्‍यात आले. यापूर्वी या नदीतील गाळ काढण्‍यासाठी निविदा जारी झाली होती. पण या कामाला हरित लवादासमोर आव्‍हान दिल्‍याने हे काम अडले होते.

त्‍यानंतर मच्‍छीमार खात्‍याने पर्यावरणीय अभ्‍यास करून हा प्रकल्‍प हाती घ्‍यावा, अशा सूचना हरित लवादाकडून करण्‍यात आल्‍या होत्‍या. मात्र मच्‍छीमार खात्‍याने हा अभ्‍यास अद्याप सुरू केलेला नाही. त्‍यामुळे हा प्रकल्‍प अजूनही मार्गी लागलेला नाही.