फातोर्डा:अनियमित पाणीपुरवठ्यामुळे सासष्टीतील कुडतरी परिसरातील हताश झालेल्या नागरिकांनी मतदारसंघातील संपूर्ण पाणी वितरण व्यवस्थेचे सर्वंकष लेखापरीक्षण करण्याची मागणी संबंधित विभागाकडे केली आहे.

येथील स्थानिकांच्या एका गटाने सार्वजनिक बांधकाम खात्याच्या पाणीपुरवठा विभागाच्या अधिकाऱ्यांची भेट घेऊन नाराजी व्यक्त केली. कुडतरीचे रहिवासी रॉक मास्कारेन्हास यांनी सांगितले, की पाणी आणि वीजपुरवठा यासारख्या मूलभूत सुविधा देखील पुरविण्यात सरकार अपयशी ठरले आहे. या भागातील जलवाहिनी अत्यंत जीर्ण झाली असून त्याच्या त्वरित दुरुस्तीची गरज आहे.

मतदारसंघात अनियमितपणे होणाऱ्या पाणीपुरवठ्याची समस्या जाणून घेण्यासाठी सर्वंकष ऑडिट करण्याची नितांत गरज आहे. ही समस्या फक्त पाणीपुरवठ्यापुरती मर्यादित नाही, तर वीजपुरवठा आणि रस्त्यांच्या देखभालीसारख्या समस्यांपर्यंतही त्याचा विस्तार आहे.

परिसरातील वीजपुरवठा आणि रस्त्यांच्या दुरवस्थेचे लेखापरीक्षण करण्याची मागणी करत नागरिकांनी इतर विभागांनाही असेच निवेदन देण्याची तयारी केली आहे. याविषयीच्या अनेक तक्रारी आहेत, आवश्यक असलेल्या पाणीवितरण व्यवस्थेतील मूलभूत समस्येचे निराकरण झालेले नाही, त्यामुळे सखोल चौकशीची गरज आहे, असेही मास्कारेन्हास म्हणाले.

दैनंदिन जीवनावर परिणाम

पाणीपुरवठ्यात वारंवार होणारा व्यत्यय नागरिकांच्या दैनंदिन जीवनावर विपरीत परिणाम करत असतो. लेखापरीक्षणाद्वारे पायाभूत सुविधांच्या सद्यःस्थितीचे मूल्यांकन केले पाहिजे, वारंवार होणाऱ्या बिघाडाची मूळ कारणे शोधली पाहिजेत आणि दीर्घकालीन उपाययोजना आखली पाहिजे.