मडगाव: कुंकळ्ळी येथे माणुसकीला काळिमा लावणारी एक घटना घडली असून आपल्याच नात्यातील एका अंध महिलेचा छळ केल्याचे प्रकरण उघडकीस आले आहे.या प्रकरणी कुंकळ्ळी पोलिस ठाण्यात तक्रार दाखल झाल्यानंतर पोलिसांनी लागलीच करवाई करताना भिकू देसाई व त्याच्या कुटुंबीयांवर गुन्हा दाखल केला आहे. पोलिस निरीक्षक डायगो ग्रासियस यांच्या मार्गदर्शनाखाली उपनिरीक्षक साहिल पागी पुढील तपास करीत आहेत.

पोलिसांनी दिलेल्या माहितीनुसार, कुंकळ्ळी येथील बेकलेमवाडा येथील अंध महिलेला जेवण व उपचारासाठी पैसे नाकारत तिचा छळ करण्यात येत होता. तसेच शौचालय बंद करून उघड्यावर नैसर्गिक विधीसाठी पाठविले जात होते. ही घटना २८ एप्रिलपूर्वीची असून पीडित महिला ही पूर्णपणे अंध असून ती संशयितांची नातेवाईक आहे. पीडित अंध महिला जेव्हा संशयिताकडे जेवण आणि वैद्यकीय उपचारांसाठी पैसे मागण्यास गेली, तेव्हा संशयितांनी तिला शिवीगाळ करत धमकावले होते.

संशयितांनी पीडित महिला वापरत असलेल्या शौचालयात माती टाकून ते कुलूप लावून बंद केले होते. यामुळे पीडितेला नैसर्गिक विधीसाठी उघड्यावर जाणे भाग पडत होते. हा प्रकार असह्य झाल्याने तिने आपल्या बहिणीला या सर्व गोष्टी कथन केला व शेवटी या अत्याचाराला वाचा फुटली. मूलभूत गरजांपासून वंचित ठेवून तिला अमानवीय वागणूक दिल्याचा ठपका संशयितांवर ठेवण्यात आला आहे.