Controversial Social Media Post On Shree Ram In Ponda: सोशल मीडियावर प्रभू श्रीरामाबद्दल वादग्रस्‍त शब्दांचा वापर करून हिंदू लोकांच्या भावना दुखविल्याप्रकरणी हिंदवी स्वराज्य संघटनेचे पदाधिकारी वासुदेव नाईक यांनी फोंडा पोलिसांत तक्रार दाखल केली आहे.

तसेच ही पोस्‍ट कणाऱ्या नाझीम अस्लम यांना अटक करून कडक कारवाई करावी अशी मागणी केली आहे.

यावेळी नाईक त्यांच्यासोबत संघटनेचे पदाधिकारी राजीव झा, उपनगराध्यक्ष विश्‍‍वनाथ दळवी, माजी नगरसेवक शांताराम कोलवेकर, नगरसेवक शौनक बोरकर, तसेच अन्‍य संघटनांचे पदाधिकारी उपस्थित होते.

वासुदेव नाईक यांनी सांगितले की, दोन दिवसांपूर्वी इस्लाम धर्मावर कोणीतरी वादग्रस्‍त विधान केले होते. तेव्हा एका न्यूज चॅनलच्‍या फेसबुक लाईव्ह पोस्टला नाझीम अस्लम यांनी प्रभू श्रीराम यांच्‍यावर वादग्रस्‍त विधान केले आहे.

प्रभू श्रीराम हे समस्‍त हिंदूंचे आराध्‍य दैवत आहे. त्‍यामुळे या पोस्‍टमुळे आमच्या भावना दुखावल्या आहेत. त्यांच्याविरोधात आम्ही फोंडा पोलिस स्थानकात तक्रार दाखल केली आहे.

पोलिसांवर आमचा पूर्ण विश्‍‍वास असून निरीक्षक तुषार लोटलीकर यांनी आपण यासंदर्भात तपास करून त्याला लवकरात लवकर अटक करण्याचे आश्वासन दिले आहे. दरम्‍यान, या प्रकरणी फोंडा पोलिसांनी १२२/२०२३ अन्वये २९५-अ, ५०५ (२) आयपीसी अंतर्गत तक्रार नोंदवून घेतली आहे.

"या प्रकरणी मी मुख्यमंत्री डॉ. प्रमोद सावंत यांच्याशी दूरध्वनीवरून बोललो आहे. तसेच आज आम्ही यासंदर्भात हिंदवी स्वराज्य संघटनेतर्फे तक्रार दाखल केली आहे."

- विश्‍‍वनाथ दळवी, फोंडा उपनगराध्यक्ष

कारवाई करणारच; कोणालाही सोडणार नाही

राज्यात धार्मिक तेढ वाढवणारे कोणतेही कृत्य खपवून घेतले जाणार नाही. कायदा व सुववस्था बिघडविणाऱ्या व अशी कृत्ये करणाऱ्यांविरोधात कठोरातील कठोर कारवाई करा, असा आदेश आपण पोलिसांना दिला आहे, असे मुख्यमंत्री डॉ. प्रमोद सावंत यांनी सांगितले.

फेसबुकवर श्री रामासंदर्भात आक्षेपार्ह लिखाण केल्याचे त्यांच्या निदर्शऩास आणून दिल्यानंतर त्यांनी हे निवेदन केले.

ते म्हणाले, "याधीही असा इशारा दिला होता. तरीसुद्धा काही लोक त्यातून काही शिकलेले नाहीत. त्यांच्यावर कारवाई झाली आणि होणार आहे. कायद्यासमोर सर्व समान आहेत. कोण कोणत्या धर्माचा वा कोणाच्या जवळचा याचा विचार केला जाणार नाही."

"दुसऱ्याच्या धार्मिक भावना दुखावण्याचा प्रयत्न मुळीच होता कामा नये. धार्मिक सलोखा व शांततेसाठी गोवा ओळखला जातो. ती ओळख पुसण्याचा प्रयत्न कोणी करू नये. कारवाईपासून कोणीही सुटणार नाही, असा इशाराही त्‍यांनी दिला."