मडगाव: मडगाव नगरपालिका दारोदार तसेच शहराच्या विविध भागांतील ब्लॅक स्पॉटवरील कचरा गोळा करण्यासाठी संबंधित एजन्सींना दरमहा लाखो रु. चुकते करत असते, पण प्रत्यक्षात कचरा वर्गीकरण करून गोळा केला जात तर नाहीच, पण ब्लॅक स्पॉटवरील कचरा तेथेच एकत्रित करून जाळून टाकण्याचे प्रकार वाढले आहेत. ठेकेदारांकडूनच रावणफोंड येथे त्या कचऱ्याला आग लावली जात आहे. त्यामुळे पालिकेने संबंधित एजन्सींची बीले फेडू नयेत, अशी मागणी शॅडो कौन्सिलने केली आहे.

कौन्सिलचे निमंत्रक सावियो कुतिन्हो यांनी शनिवारी आके रावणफोंड पुलाजवळील ब्लॅक स्पॉटवरील कचऱ्याला अशा प्रकारे संबंधित एजन्सींच्या कामगारांनीच आग लावल्याचे प्रकरण छायाचित्रासह उघड केले असून पालिकेने याची गंभीर दखल घ्यावी, अशी मागणी केली आहे. हे प्रकार न्यायालयाने केलेल्या सूचने विरुध्द असल्याचा दावा करून तेथे दाद मागण्याचा इशाराही दिला आहे.

यापूर्वी अशाच प्रकारे पालिका उद्यानात, आनाफोंत गार्डन व अन्यत्र कचरा गोळा करून आग लावल्याचे उघडकीस आले होते. आग लावण्यासाठीच या एजन्सींना भरमसाट रक्कम चुकती केली जातात का? असा सवाल केला आहे. आज ज्या एजन्सीकडून हे कृत्य घडले आहे, तिला पालिका दरमहा 15 लाख रु. रक्कम चुकती करत आल्याचे त्यांनी नमूद केले आहे.