सासष्टी: जिल्हा पंचायत आणि गोवा विद्यापीठातील विद्यार्थी परिषदेच्या निवडणुकांचे निकाल म्हणजे, गोव्यातील कॉंग्रेस पुनरुज्जीवनाच्या दृष्टीने पहिले पाऊल असल्याची प्रतिक्रिया विरोधी पक्षनेते युरी आलेमाव यांनी व्यक्त केली.

मडगावात जिल्हा पंचायत तसेच विद्यापीठ निवडणुकीतील विजयी उमेदवारांचा कॉंग्रेसतर्फे गौरव करण्यात आला. यावेळी ते बोलत होते.

आलेमाव म्हणाले, की आमच्या पक्षाची विद्यार्थी परिषद आता गोवा विद्यापीठातील कुलगुरू व उपकुलगुरू यांच्या हुकुमशाहीला लगाम घालणार आहे. त्याचप्रमाणे अफरातफर, बेकायदेशीरपणा, भ्रष्टाचार यांचे पूर्णपणे निर्मूलन करण्यासाठी प्रयत्न करणार आहे.

खासगी विद्यापीठांना मान्यता, हा एक घोटाळा आहे. आम्ही विधानसभेत खासगी विद्यापीठाच्या मान्यतेला विरोध केला होता. ही खासगी विद्यापीठे गोमंतकीय विद्यार्थी आणि गोव्याच्या हिताची मुळीच नाहीत, असेही आलेमाव यांनी सांगितले.

‘एनएसयुआय’चे राष्ट्रीय अध्यक्ष वरुण चौधरी म्हणाले, की गोवा विद्यापीठ निवडणुकीत मुख्यमंत्र्यांनी सर्व शक्ती पणाला लावली होती; पण त्याचा काहीच उपयोग झाला नाही.

दडपशाहीसमोर विद्यार्थी नमले नाहीत

कॉंग्रेस नेते गिरीश चोडणकर म्हणाले, की ‘अभाविप’ने नेहमीच लबाडी, हातचलाखी करून विद्यापीठातील निवडणुका जिंकल्या. भाजपच्या दडपशाहीसमोर विद्यार्थी नमत नाहीत, हे या निवडणुकीतील विजयाने दिसून आले आहे.

विद्यार्थी संघटना मजबूत करणार

गोवा विद्यापीठ निवडणुकीत ‘एनएसयुआय’ विद्यार्थी संघटनेचा विजय याला ऐतिहासिक महत्त्व आहे. २०२२ मध्ये कॉंग्रेसचा १८ ते ३५ वयोगटातील युवकांशी संपर्क काही प्रमाणात तुटला होता. या वयोगटातील युवकांचा मतांचा वाटा ३० टक्के आहे. त्यामुळे यापुढे विद्यार्थी संघटना मजबूत करण्याकडे कॉंग्रेस लक्ष देणार आहे.