Junta House Panaji Structural audit

पणजी: अनेक सरकारी कार्यालये असलेल्या पणजी येथील जुना हाउसचे स्ट्रक्चरल ऑडिट राज्य सरकार करणार आहे.

स्ट्रक्चरल ऑडिट आणि नॉन-डिस्ट्रक्टिव्ह टेस्टिंग (एनडीटी) पूर्ण करण्यासाठी सरकार ११ लाख रुपयांहून अधिक खर्च करणार आहे, त्यावर आता काँग्रेसचे माजी प्रदेशाध्यक्ष गिरीश चोडणकर यांनी आक्षेप घेतला आहे. जुन्ता हाऊस ही धोकादायक इमारत सरकारनेच जाहीर केली आहे, तर तिचे स्ट्रक्चरल ऑडिट कशासाठी असा सवाल त्यांनी केला आहे.

सार्वजनिक बांधकाम खात्याने स्ट्रक्चरल ऑडिटसाठी बोलीदारांना काही दिवसांपूर्वी आमंत्रित केले आहे आणि निवडलेल्या बोलीदाराने १५ दिवसांच्या आत ऑडिट पूर्ण करणे आवश्यक असल्याचे म्हटले आहे.

सरकारी इमारतींची दुरवस्था झाली आहे. जुन्ता हाऊस ही इमारत एकेकाळी सरकारच्या प्रशासकीय कार्यालयांची इमारत म्हणून ओळख होती, परंतु या इमारतीतून अनेक कार्यालयांचे स्थलांतर झाले आहे. आता काही मोजकीच कार्यालये या इमारतीत आहेत व त्यात परिवहन खाते हे प्रमुख कार्यालय आहे.

११ लाख रुपये कमी नव्हे !

जुन्ता हाऊस ही सर्वात जुनी सरकारी इमारत आहे, या इमारतीच्या सुरक्षेबाबत वारंवार प्रश्न उपस्थित झाले आहेत. स्ट्रक्चरल ऑडिट करून घेणे म्हणजे केवळ भ्रष्टाचारासाठी शोधलेला नवा उपाय आहे, असे स्पष्ट दिसते. ११ लाख रुपये ही काही कमी रक्कम नाही, असेही चोडणकर म्हणाले.