पणजी: प्रदेशाध्‍यक्ष बदलावरून प्रदेश काँग्रेसमध्ये सुरू असलेली धुसफूस कायम असून विद्यमान प्रदेशाध्‍यक्ष अमित पाटकर आणि माजी प्रदेशाध्‍यक्ष गिरीश चोडणकर या दोन गटांतील नेत्‍यांकडून पक्षावर दबाव आणण्‍याचे प्रयत्‍नही सुरू झाले आहेत.
पाटकर यांना प्रदेशाध्‍यक्षपदावरून हटवल्‍यास सामूहिक राजीनामे देण्‍याचा इशारा पाटकर समर्थकांकडून दिला जात आहे, तर पाटकर यांना तत्‍काळ न हटवल्‍यास पदांचे राजीनामे देण्‍याची भूमिका चोडणकर समर्थकांनी घेतली आहे. हे दोन्‍ही गट विविध मार्गांनी पक्षावर दबाव टाकण्‍याचा प्रयत्‍न करीत असल्‍याची माहिती काँग्रेसमधील सूत्रांनी दिली.
अमित पाटकर यांना हटवून त्‍यांच्‍याजागी गिरीश चोडणकर यांची पुन्हा एकदा प्रदेशाध्‍यक्षपदी वर्णी लावण्‍याची प्रक्रिया काँग्रेसश्रेष्‍ठींनी सुरू केल्‍याचे वृत्त विविध वर्तमानपत्रांनी प्रसिद्ध केल्‍यापासून प्रदेश काँग्रेसमध्ये खळबळ माजलेली आहे.
विधानसभा निवडणुकीनिमित्त सध्‍या तामिळनाडूत असलेल्‍या गिरीश चोडणकर यांनीही आपण पक्षाचा प्रामाणिक कार्यकर्ता आहे. पक्ष जी जबाबदारी देईल ती आपण स्‍वीकारण्‍यास तयार असल्‍याचे स्‍पष्‍ट केले आहे. त्‍यात काँग्रेसच्‍या (Congress) वरिष्‍ठ नेत्‍यांकडूनही गिरीश चोडणकरच पुन्हा प्रदेशाध्‍यक्ष होतील, असे संकेत दिले जात आहेत. त्‍यामुळे पाटकर गट आक्रमक झालेला आहे. या गटातील काही जणांनी नुकतीच बंगळुरात जाऊन पक्षाध्‍यक्ष मल्लिकार्जुन खरगे यांची भेट घेत आपल्‍याला पाटकरच प्रदेशाध्‍यक्षपदी हवेत, अशी मागणी केली आहे.
तर दुसरीकडे अमित पाटकर (Amit Patkar) प्रदेशाध्‍यक्षपदी राहिल्‍यास आगामी जिल्‍हा पंचायत, पालिका आणि २०२७ मधील विधानसभा निवडणुकीत काँग्रेसला यश मिळणार नाही. त्‍यामुळे त्‍यांना तत्‍काळ या पदावरून न हटवल्‍यास सामूहिकरीत्या पदांचे राजीनामे देण्‍याची भूमिका चोडणकर गटाने घेतली आहे. त्‍याबाबतचे पत्र श्रेष्‍ठींना पाठवण्‍याची तयारीही त्‍यांनी सुरू केली आहे. त्‍यामुळे प्रदेशाध्‍यक्ष बदलावरून दोन्‍ही गटांमध्‍ये अंतर्गत कुरघोडीही वाढल्‍याचे सूत्रांनी सांगितले.
२०२२ च्या विधानसभा निवडणुकीपूर्वी गिरीश चोडणकर काँग्रेस प्रदेशाध्‍यक्षपदी होते. या निवडणुकीत झालेल्‍या पराभवाची जबाबदारी स्‍वीकारून त्‍यांनी या पदाचा राजीनामा दिला होता. त्‍यानंतर पक्षश्रेष्‍ठींनी अमित पाटकर यांची अध्‍यक्षपदी नेमणूक केली. पाटकर गेल्या तीन वर्षांपासून अधिक काळ या पदावर असूनही प्रदेश काँग्रेसमधील मरगळ दूर होत नसल्‍यामुळे त्‍यांना हटवण्‍याचा आणि पक्ष संघटनेचा अनुभव असलेल्‍या चोडणकर यांची प्रदेशाध्‍यक्षपदी नेमणूक करण्‍याचा निर्णय पक्षाने घेतल्‍याचेही सूत्रांनी नमूद केले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.