BJP Goa Protest

पणजी: गेले दोन दिवस लोकसभेत काँग्रेसकडून डॉ. बाबासाहेब आंबेडकरांच्यावरून राजकारण सुरू आहे. काँग्रेस नेते राहुल गांधी यांच्याकडून सुरू असलेला हा प्रकार निषेधार्ह असल्याचा दावा करून गुरुवारी ‘भाजयुमो’ने काँग्रेस भवनासमोर जोरदार घोषणाबाजी करून निषेध व्यक्त केला.

माजी आमदार दामू नाईक, भाजयुमोचे गोवा प्रदेशाध्यक्ष समीर मांद्रेकर यांच्यासह भाजयुमोचे कार्यकर्त्यांनी दुपारी भाजप कार्यालयपासून निषेध फेरी काढली. काँग्रेस भवनासमोर येऊन त्यांनी जोरदार घोषणाबाजी केली, यावेळी दामू नाईक म्हणाले, घटनेचे शिल्पकार डॉ. आंबेडकर यांच्यावर काँग्रेसने अन्याय केला. माजी पंतप्रधान नेहरूंच्या काळात त्यांना दुय्यम वागणूक देण्यात आली. ‘भारतरत्न’सारखा सन्मान त्यांना देण्यातही काँग्रेसला नकोसे वाटत होते.

राज्यघटनेवरील चर्चेत गृहमंत्री अमित शहा यांनी आपल्या भाषणात डॉ. आंबेडकरांवर काँग्रेसच्या राजवटीत कसा अन्याय झाला, याचा आलेख मांडला आणि त्यांनी सर्व माहिती पटलावर ठेवली होती.

कॉंग्रेसचे कारनामे जनतेपर्यंत नेऊ !

डॉ. आंबेडकरांचा शहा यांनी अपमान केल्याची व्हिडिओ क्लिप तयार करून ती व्हायरल केली. काँग्रेसचे नेते राहुल गांधी यांंनी गुरुवारी संसदेसमोर आंदोलन करणाऱ्या भाजपच्या खासदारांना धक्काबुक्की केली. या सर्व घटनेचा भाजपच्यावतीने निषेध करण्यात येत आहे. काँग्रेसच्या या वागणुकीचा आम्ही निषेध करतो. भाजपच्यावतीने संविधान दिवस साजरा होत आहे. काँग्रेसने सुरू केलेले कारनामे राज्यातील जनतेपर्यंत नेले जातील, असेही दामू नाईक यांनी सांगितले.