पणजी: हणजूण पोलिस स्थानकातील कॉन्स्टेबल तथा ड्युटी मास्‍तर रामा परब याच्या निलंबनाबाबत पोलिस वर्तुळात उलटसुलट चर्चा सुरू असतानाच पोलिस अधीक्षक अक्षत कौशल यांनी त्‍याच्‍या निलंबनाचा आदेश जारी करताना घोळ घातल्‍याचे स्‍पष्‍ट झाले आहे.

रामा परब याच्याविरोधात १५ ऑगस्ट २०२४ रोजी तक्रार आली असताना अधीक्षक कौशल यांनी मात्र १६ जून २०२४ या तारखेने त्याच्यावर कारवाई करण्याचे निर्देश जारी केले आहेत. त्यामुळे या प्रकरणासंदर्भात पुन्हा एकदा चर्चा सुरू झाली आहे.

हणजूण येथील विष्णू शिरोडकर नामक व्यक्तीने रामा परबविरोधात उत्तर गोवा पोलिस अधीक्षकांच्या नावे तक्रार केली होती. हा कॉन्स्टेबल भ्रष्टाचारी असून, आपल्‍या मर्जीतील काही पोलिस कॉन्स्टेबल्सनाच ठरावीक ठिकाणी ड्युटीवर पाठवत असल्याचे पोलिस अधीक्षक अक्षत कौशल यांच्या निदर्शनास आणून दिले होते. या तक्रारीची दखल घेत त्यांनी स्वहस्ताक्षराने शेरा मारला होता.

पोलिस अधीक्षक म्‍हणतात, ती ‘नजरचूक’

रामा परब याच्‍याविरोधात असलेले आरोप खूपच गंभीर स्वरूपाचे आहेत. त्यामुळे त्वरित त्याच्या निलंबनाचा आदेश जारी करण्यात यावा, असे त्या तक्रारीत नमूद करण्‍यात आले होते. आता उघडकीस आलेल्‍या तारखेच्‍या घोळामुळे रामा परब याच्‍या निलंबन प्रकरणाकडे संशयाने पाहिले जात आहे. यासंदर्भात स्पष्टीकरण करताना पोलिस अधीक्षक अक्षत कौशल यांनी ती ‘नजरचूक’ असल्याचे सांगितले.