मडगाव : चाकूचा धाक दाखवून एका व्यक्तीला मारहाण केल्याप्रकरणी पोलिसांनी आरोपीविरोधात तक्रार दाखल केली आहे. मायणा पोलिसांकडे चाकू हल्ला केल्याची वर्दी देण्यात आली होती. यानंतर रविवारी पोलिसांनी तक्रार दाखल करुन घेत पुढील तपास सुरु केला आहे.

मायणा कुडतरी पोलिस स्टेशनच्या हद्दीत शनिवारी आरोपीने चाकूचा धाक दाखवून एका व्यक्तीला धमकावल्याची प्राथमिक माहिती आहे. राय भागात शनिवारी संध्याकाळी ही घटना घडली आहे. रुपेश नाईक नावाच्या तरुणाने सेबी फेराव याच्याविरोधात तक्रार दाखल केली आहे. सेबी याची पार्श्वभूमी गुन्हेगारी स्वरुपाची असल्याची माहिती आहे.

शनिवारी झालेल्या या घटनेनंतर पीडिताच्या फीर्यादीवरुन पोलिसांनी (Police) रविवारी तक्रार दाखल केली आहे. पीडिताने दिलेल्या तक्रारीनुसार आरोपीने विनाकारण आपल्याला त्रास दिला आणि जवळील चाकूचा धाक दाखवत धमकावल्याचं नमूद करण्यात आलं आहे. यानंतर लोक जमा होत असल्याचं पाहून घटनास्थळावरुन पोबारा केला, असंही तक्रारीत नोंद आहे. या धमकावण्यामागचा आरोपीचा उद्देश काय होता याबाबत अजूनही अस्पष्टता आहे. मायणा कुडतरी पोलिसांनी तक्रारीच्या आधारावर तपास सुरु केला आहे.