Panaji News : काकरा येथील होड्यांना आग लागून त्या खाक झाल्या होत्या. भरपाईसाठी होडी मालकांनी केलेल्या अर्जावर योग्य निर्णय घेऊन भरपाई देण्यात आली आहे. कोणावरही अन्याय केलेला नाही. या होड्यांना पूर्ववैमनस्यातून आगी लावण्यात आल्या होत्या. यासंदर्भात पोलिसांत तक्रार दाखल झाली होती. या होड्यांचे नुकसान नैसर्गिकदृष्‍ट्या झालेले नसतानाही भरपाई देण्यात आल्याचे स्पष्टीकरण मत्स्योद्योग मंत्री नीळकंठ हळर्णकर यांनी केले.

काही दिवसांपूर्वी काकरा येथील पारंपरिक होडी मालकांनी मत्स्योद्योग खात्याच्या अधिकाऱ्यांना निवेदन देऊन भरपाईच्या रकमेत घट झाल्याबाबत विचारणा केली होती. कॉर्पस निधीतून ही भरपाई देता येते, मात्र ती देण्यात दिरंगाई सुरू आहे, असे आरोप केले होते. त्यावर मंत्री हळर्णकर म्हणाले की, एखाद्या मच्छिमाराच्या होडीचे किंवा बोटीचे नैसर्गिक नुकसान झाले असेल तर त्याचा विचार भरपाईसाठी होतो.

या भरपाईसंदर्भात निर्णय मंत्री किंवा खात्याचे संचालक घेत नाहीत, तर त्यासाठीची नियुक्त समिती घेत असते. त्यामुळे भरपाई किती द्यावी, याच्याशी मंत्री किंवा संचालकांचा काहीही संबंध नाही. कोणावरही अन्याय झालेला नाही.खात्याकडे तीन अर्ज आले होते, त्यापैकी दोघांना भरपाईस मंजुरी दिली गेली आहे. ही भरपाई झालेल्या नुकसानीच्या आधारावर व कोणत्या प्रकारे झाली आहे, यावरून दिली गेली आहे,असेही हळर्णकर म्हणाले.