म्हापसा: कोलवाळ येथील मध्यवर्ती कारागृहात क्राईम ब्रँचने पोलिसांच्या सहकार्याने छापा टाकला असता, पुन्हा एकदा कारागृहातील कैद्यांजवळ मोबाईल संच तसेच काही प्रमाणात तंबाखूजन्य पदार्थ आढळल्याने खळबळ उडाली आहे. यापूर्वीही अनेकदा कारागृहात टाकलेल्या छाप्यांमध्ये मोबाईल, ड्रग्स आढळले होते. शनिवारी या कारवाईवेळी पोलिसांचा मोठा लवाजमा उपस्थित होता.

उपलब्ध माहितीनुसार, कोलवाळ मध्यवर्ती कारागृहात शनिवारी (ता. ६) दुपारी अचानक छापा टाकण्यात आला. गुन्हे शाखेच्या पोलिसांनी कोलवाळ पोलिसांसह तुरुंगातून ८ मोबाईल फोन, काही प्रमाणात तंबाखूजन्य पदार्थ, काही मोबाईल चार्जर जप्त केले आहेत. यावेळी पोलिस महानिरीक्षक, जे तुरुंगाचे ‘आयजी’ आहेत, तसेच गुन्हे शाखेचा कार्यभार सांभाळणारे उत्तर गोवा अधीक्षक राहुल गुप्ता उपस्थित होते.

कोलवाळ कारागृहात कैद्यांना बेकायदा सवलती देण्यापासून ते तुरुंगात अमली पदार्थांचा पुरवठा करण्यापासून कैद्यांकडून अयशस्वी पलायनाचे प्रयत्न झाले आहेत. शनिवारच्या कारवाईनंतर कारागृहातील सुरक्षतेचा प्रश्न पुन्हा ऐरणीवर आला आहे. एकूणच तुरुंगातील कारभार हा रामभरोसे सुरू असल्याचा प्रत्यय पुन्हा एकदा शनिवारच्या छाप्यानंतर उघड झाला आहे.

लाखोंचा ऐवज हस्तगत

कारागृहात कैद्यांमार्फत मोबाईल फोनचा वापर केला जात असल्याची माहिती तुरूंग प्रशासनाला मिळाली होती. या माहितीच्या आधारे गुन्हा शाखेच्या पोलिसांनी कारागृहातील सर्व विभागांची झडती घेतली.

यावेळी अंडर ट्रायल व कन्विक्ट विभागात प्रतिबंधित वस्तू सापडल्या. यात ८ मोबाईल फोन, दोन ग्रॅम गांजा, पाच पाकिटे तंबाखूचा समावेश आहे. जप्त केलेल्या इंपोर्टेड तंबाखूची किंमत ६० हजार रुपये तर गांजाची दोन हजार आहे. शिवाय मोबाईल फोन हे ॲंण्ड्रोईड असल्याने त्यांची किंमत दोन-तीन लाखांच्या घरात आहे.