मडगाव : पर्यटनमंत्री रोहन खंवटे यांनी कोलवा किनाऱ्यावरील दुकानदारांना आश्वासन दिले की, स्वदेश दर्शन २.० प्रकल्पाचा पहिला टप्पा सुरू असताना त्यांना तात्पुरत्या खास आखलेल्या जागांवर स्थलांतरित केले जाईल. खंवटे यांनी पुनर्विकास योजनांवर चर्चा करण्यासाठी दुकान मालकांसोबत नुकतीच बैठक घेतली.

नंतर त्यांनी पत्रकारांना सांगितले, की सुविधा सुधारण्याच्या दृष्टीने कोलवासाठी एक व्यापक मास्टर प्लॅन तयार करण्यात आला आहे. गैरसोय कमी करण्यासाठी, दुकानदार बांधकाम पूर्ण होईपर्यंत विशेष आखणी केलेल्या कंटेनरमधून काम करतील, असे ते म्हणाले.

कोलवा हे दक्षिण गोव्यातील सर्वांत लोकप्रिय ठिकाणांपैकी एक आहे, जे देशी आणि आंतरराष्ट्रीय पर्यटकांना आकर्षित करते. तथापि खंवटे यांनी सांगितले की, सध्याची रचना शॉपिंग एरियासह जीर्ण अवस्थेत आहे आणि त्वरित पुनर्रचना करण्याची आवश्यकता आहे.

सरकार स्थानिक घटकांचे हित जपून कोलवाला चांगल्या पायाभूत सुविधा आणि अन्य सुविधा देण्यास वचनबद्ध आहे. स्थलांतर हे तात्पुरते पाऊल आहे आणि पुनर्विकास पूर्ण झाल्यानंतर पर्यटक आणि दुकानमालक दोघांनाही मदत होईल, अशा पद्धतीने सुविधा सुधारल्या जातील, असे खंवटे यांनी सांगितले.

बाणावलीचे आमदार वेंझी व्हिएगस, जीटीडीसीचे व्यवस्थापकीय संचालक कुलदीप आरोलकर, पर्यटन उपसंचालक दीक्षा तारी, कोलवा पंचायतीचे प्रतिनिधी आणि इतर अधिकारी यांनी बैठकीला उपस्थिती लावली. प्रकल्पाच्या पहिल्या टप्प्यात आगमन मार्गावर पदपूल, शॉपिंग आणि फूड प्लाझाची पुनर्बांधणी, सीसीटीव्ही सुविधांसह पर्यटनस्थळ ब्लॉक, सुधारित चिन्हे आणि रस्त्यावरील इतर सुविधांचा समावेश असेल.