फोंडा: राज्यात सर्वत्र आयआयटी उभारण्यास विरोध होत असतानाच, आज कोडार-फोंडा येथेही ग्रामस्थांनी जोरदार आक्षेप नोंदविला. ‘आयआयटी आमका नाका’ अशी घोषणा देऊन ग्रामस्थांनी एकजूट दाखवली. प्रसंगी आंदोलन उभारण्याचाही इशारा दिला.

कोडार ग्रामस्थांची बैठक कोडार कोमुनिदाद क्षेत्रात झाली. आयआयटीसाठी जागा ताब्यात घेण्याच्या सरकारी प्रयत्नांचा यावेळी निषेध करण्‍यात आला. ग्रामस्थांनी सह्यांची मोहीम राबवून लोकप्रतिनिधी व संबंधित सरकारी खात्‍यांना निवेदने देण्याचा निर्णय घेतला.

तसेच स्थानिकांच्या हिताला धक्का पोहोचवणारा हा प्रकल्प रद्द करावा, अशी मागणी लावून धरली. बेतोडा पंचायत क्षेत्रातील कोडार येथील साडेचौदा लाख चौरस मीटर जमीन (कोमुनिदाद) आयआयटीसाठी ताब्यात घेण्याकरिता सरकारने प्रक्रिया सुरू करण्याची तयारी केली आहे. त्यासाठी स्थानिक लोकांना हरकती असल्यास ३० दिवसांत देण्याची सूचना सरकारकडून करण्यात आली होती. त्यास अनुसरून कोडार ग्रामस्‍थांची ही बैठक घेण्यात आली.

प्रकल्पाबाबत ग्रामस्थांची भीती

कोमुनिदादच्‍या या साडेचौदा लाख चौरस मीटर जमिनीपैकी फक्त २ लाख चौरस मीटर डोंगराळ भाग असून उर्वरित शेती व बागायतींनी व्यापलेली आहे. तसेच या निसर्ग परिसरात बिबट्या, गवे, रानडुक्कर यांसारखे वन्यजीव मोठ्या प्रमाणावर आहेत. त्‍यांच्‍यावर गदा येईल. तसेच ओपा जलप्रकल्पावर परिणाम होण्याची शक्यता ग्रामस्‍थांनी व्‍यक्त केली.

सत्तरी, सांगे, केपेनंतर आता कोडार!

राज्यात आयआयटी उभारण्याचा दृढ निश्‍चय केलेल्या राज्य सरकारला हा जोरदार झटका आहे. यापूर्वी सत्तरी, सांगे आणि केपेत लोकांनी आयआयटी उभारण्यासाठी जोरदार विरोध दर्शवला होता. सत्तरी येथे तर मोठे आंदोलन छेडले गेले होते. त्या पार्श्‍वभूमीवर आता कोडारवासीयही एकवटले आहेत.