फोंडा: कोडार-बेतोडा येथील नियोजित आयआयटी प्रकल्पाच्या विरोधात ग्रामस्थ एकवटले असून विरोधाची ही धार अधिक तीव्र बनत चालली आहे. रविवारी कोडार येथील बेताळ देवस्थानच्या सभागृहात झालेल्या बैठकीत ‘आयआयटी’ प्रकल्प नको, अशा भूमिकेवर ग्रामस्थ ठाम राहिले.

या बैठकीत ग्रामस्थांनी आयआयटी विरोधातील आंदोलनाची दिशा ठरवण्यासाठी सविस्तर चर्चा करण्यात आली. सर्वांना एका छत्राखाली आणण्याबरोबर कोमुनिदाद प्रशासक, बेतोडा पंचायत व इतर सर्व संबंधितांसह विरोधी पक्ष आमदारांनाही यासंदर्भात निवेदन देण्याचे ठरले.

या बैठकीला विश्राम गावकर तसेच इतर उपस्थित होते. बैठकीत ग्रामस्थांसमवेत ‘आरजी’ नेते तसेच सामाजिक संघटनांचे कार्यकर्तेही उपस्थित होते. बैठकीत आयआयटी कोडार येथे उभारल्यास त्याचे दुष्परिणाम काय होतील, याबाबत सविस्तर चर्चा करण्यात आली.

आयआयटी प्रकल्पामुळे आमच्या समस्यांमध्ये वाढ होणार अशी चिंता यावेळी उपस्थित काही ग्रामस्थांनी व्यक्त केली. येत्या तीन-चार दिवसांत मुख्यमंत्र्यांकडे ग्रामस्थांची चर्चा होणार असून या बैठकीत मुख्यमंत्र्यांना कोडार गावच्या जैवविविधता तसेच निसर्ग संपन्नतेबाबतही सांगण्यात येणार आहे.