Codar IIT Project: 'आयआयटी'ला तीव्र विरोध! कोडारवासीयांची सह्यांची मोहीम; मंत्री सुभाष शिरोडकर यांना निवेदन

फोंडा: आयआयटी प्रकल्पाला सध्या लोकांचा विरोध वाढत असून लोक एकवटले असल्याने सत्तरी, सांगे आणि केपेप्रमाणेच येथेही आयआयटीचा ‘फियास्को’ होण्याची शक्यता आहे. सरकारने आयआयटी रद्द करावी, अशी जोरदार मागणी स्थानिकांनी केली आहे. दरम्यान, कोडार येथे आयआयटी आणण्यास कोडारवासीयांचा तीव्र विरोध असल्याचे ग्रामस्थांतर्फे एक निवेदन विश्राम गावकर व इतरांनी स्थानिक आमदार तथा सहकारमंत्री सुभाष शिरोडकर यांना दिले.

कोडार येथील १४ लाख ६३ हजार चौरस मीटर जमीन आयआयटीसाठी देण्याचे कोमुनिदादने ठरवल्यानंतर यासंबंधीच्या हरकती ३० दिवसांच्या आत देण्याची सूचना सरकारने केली आहे. या सूचनेमुळे आता ग्रामस्थांत चलबिचल निर्माण झाली असून प्रस्तावित आयआयटी प्रकल्पामुळे कोडार व नजीकच्या भागातील जैवसंपदा धोक्यात येण्याची शक्यता स्थानिकांनी व्यक्त केली आहे.

विशेष म्हणजे कोडार आणि इतर भागातील लोक शेतीबागायतीवर निर्भर आहेत. या भागात नोकऱ्यांचे प्रमाण दुय्यम असून सरकारी नोकर तर नगण्य आहेत. त्यामुळे सर्वस्वी शेती बागायतीवर निर्भर असलेल्या शेतकऱ्यांनी आयआयटीला तीव्र विरोध दर्शवला आहे.

प्रस्ताविक जागा ही खडकाळ असल्याचे सांगितले जात असले तरी खुद्द कोमुनिदादच्या पदाधिकाऱ्यांनी या भागातच मोठ्या प्रमाणात लागवड केली आहे, त्यामुळे मुख्यमंत्र्यांनी प्रत्यक्ष भेट देऊन पाहणी करण्याची मागणी यावेळी लोकांनी केली. या भागातील रोजीरोटीचे साधन नष्ट होऊ देणार नाही, आम्हाला आमची शेती-बागायती वाचवायची आहे, असे मत ग्रामस्थांनी व्यक्त केले.

कोडार तसेच बेतोडा व इतर भागात वनसंपदा मोठ्या प्रमाणात आहे. येथील ८० टक्के जमीन ही लागवडीसाठी सुयोग्य असून त्यात लोक भाजीपाला तसेच इतर पिके घेतात. मुळात ज्या ठिकाणी आयआटी प्रकल्प प्रस्तावित आहे त्या भागाला ‘वाघोटी’ असे म्हणतात. या भागात वाघांचा संचार असल्याने वाघोटी हे नाव पडले असून इतर प्राण्यांत रानडुक्कर, गवे, मोर, हरण तसेच अन्य प्राण्यांचा समावेश आहे. आयआयटी प्रकल्प आल्यास या जनावरांनी जायचे कुठे, असा सवाल ग्रामस्थांनी केला.

रोजीरोटी धोक्यात

स्थानिकांची रोजीरोटी धोक्यात

कष्टकरी समाज पीक काढून पोट भरतो, त्यावर गदा येणार

आदिवासी समाजाचे कोडार - बेतोड्यात प्राबल्य

जैवसंपदेसह झाडांंची होणार मोठ्या प्रमाणात कत्तल

वन्यप्राण्यांचा अधिवास धोक्यात

कूपनलिका खोदल्यास स्थानिकांना पाण्याची टंचाई

स्थानिकांना अंधारात ठेवून निर्णय घेतल्याचा दावा

बेतोडा पंचायतीने ग्रामसभा घेऊन आयआयटीविरोधात ठराव घेण्याची मागणी.

स्थानिक आमदारासह कोमुनिदाद प्रशासक आणि इतर संबंधितांना देणार निवेदने