साखळी: आपल्या हातातील मोबाईलवर केवळ रिल्स पाहून कोणत्याही प्रकारचे ज्ञान मिळणार नाही. त्याऐवजी मोबाईलवरील नावीन्यपूर्ण तंत्रज्ञान शिकून त्याचा वापर आपले ध्येय गाठण्यासाठी करावा, असे आवाहन मुख्यमंत्री डॉ. प्रमोद सावंत यांनी केले.

साखळी येथील रवींद्र भवनात सम्राट इंटरनॅशनलतर्फे सम्राट स्टुडंट फाउंडेशनच्या रौप्य महोत्सवानिमित्त गुणवंत विद्यार्थी तसेच विविध क्षेत्रांत उल्लेखनीय यश संपादन केलेल्या २५ जणांचा गौरव करण्यात आला.

यावेळी प्रसिद्ध सिनेकलाकार अजय पुरकर, सम्राट स्टुडंट फाउंडेशनचे अध्यक्ष धर्मा चोडणकर, सम्राट क्लब इंटरनॅशनलचे अध्यक्ष संदीप निगळ्ये, सम्राट क्लब राज्य १ चे अध्यक्ष शशिकांत पुनाजी, आयोजन समितीचे अध्यक्ष रूपेश ठाणेकर, माजी राज्याध्यक्ष तथा संचालक दीपक नार्वेकर आदी उपस्थित होते.

गोव्यात नवीन शैक्षणिक युगाला सरकारने प्रारंभ केला असून, त्यानुसार शिक्षणपद्धती राबविण्यात येत आहे. राज्यात केवळ आर्थिक कारणांमुळे कोणीही शिक्षणापासून वंचित राहू नये, याची खबरदारी सरकारने घेतली आहे, असे मुख्यमंत्र्यांनी पुढे सांगितले. यावेळी अजय पुरकर यांनी विद्यार्थी, शिक्षक आणि पालकांना मार्गदर्शन केले.

२५ गुणवंत विद्यार्थ्यांचा गौरव

मुख्यमंत्री डॉ. प्रमोद सावंत यांच्या हस्ते रियाना अब्बास अली नदाफ, श्रुती सतीशकुमार सावंत, डेलस्टन डिसोझा, वृषभ रामदास सतरकर, रुद्रेश रोहिदास शेटकर, श्रेया श्रीधर नाईक, मंजुषा रोहिदास मडकईकर, भूपेश पंढरी नाईक, डॉ. श्रुती मंगेश नाईक, मंगेश सागर साकोर्डेकर, डॉ. निमिषा महेश पारकर, डॉ. तन्वी सुबीर संजीगिरी, डॉ. तृप्ती सुदाम आरोंदेकर, वैभवी भालचंद्र गावस, वेदांग विश्वास सतरकर, डॉ. श्रीराज प्रमोद सावंत, नेहा डा रोचा, डॉ. श्रीगणेश योगानंद नागवेकर, प्रथमेश प्रेमानंद शानबाग, डॉ. ओजस्वी सिताराम गावडे, रीमा राजेंद्र परब, नमिता तुकाराम अडवईकर, विशाखा गोविंद माटकर, मेखला अनंत साळकर आणि श्रावणी अभिषेकी यांचा गौरव करण्यात आला.