पणजी: मुख्यमंत्री डॉ. प्रमोद सावंत यांच्या नेतृत्वाखाली गोवा सरकारने आयएचसीएल ताज ग्रुप आणि संचालनालय ऑफ स्किल डेव्हलपमेंट यांच्या सहकार्याने राज्यात नवीन स्किल डेव्हलपमेंट सेंटर सुरू करण्यासाठी करार केला आहे.

हा उपक्रम गोव्यातील तरुणांसाठी स्किलिंग, रिस्कीलिंग आणि अपस्किलिंग यासंदर्भात मोठी संधी निर्माण करणार आहे. हे सेंटर एका वर्षात पूर्ण होणार असून, प्रारंभी १००० विद्यार्थ्यांना प्रशिक्षण दिले जाणार आहे.

पुरुष आणि महिलांसाठी असलेल्या या अभ्यासक्रमांत फूड प्रोडक्शन, फूड सर्विसेस, फ्रंट ऑफिस आणि हाऊसकीपिंग या चार विभागांचा समावेश असेल. देशभरात ताज ग्रुपची ४७ कौशल्य विकास केंद्रे आहेत, आणि आता गोवा देखील त्यात सामील होणार आहे.

मुख्यमंत्री डॉ. प्रमोद सावंत यांनी सांगितले की, गोव्यासाठी हा कौशल्य विकासाच्या दृष्टिकोनातून मोठा दिवस आहे. गेल्या वर्षभरात ११ आयटीआय केंद्रांमध्ये हॉस्पिटॅलिटी अभ्यासक्रम सुरू करण्यात आला आहे. ताज ग्रुपसोबत भागीदारी करत आग्वाद फोर्ट येथे स्किल डेव्हलपमेंट सेंटर स्थापन होणार आहे.

१ लाख लोकांना प्रशिक्षण!

दरवर्षी १००० विद्यार्थ्यांना रोजगार मिळण्याची खात्री असून, २०३० पर्यंत बहुसंख्य लोकांना प्रशिक्षण देण्याचे लक्ष्य सरकारने ठरवले आहे. मुख्यमंत्री प्रमोद सावंत यांनी आयएचसीएलचे एमडी तथा सीईओ पुनीत कुमार चतवाल यांचे आभार मानले आणि गोव्यातील पर्यटन क्षेत्राच्या वाढीसाठी ही भागीदारी महत्त्वाची ठरणार असल्याचे सांगितले.